Лух Авт
Мет юраңат па каркамат
ГТО нормативат мийман, па хон муват кутан, Ямал мувев оӆңа этмаӆ. Кимет квартал манам верат ӆуңтам юпийн, щиты ястаса. Округев ӆыпийн па Ӆорвош районэв хуӆам оӆаң местайт кутан уӆ.
Ӆорвош районан хащам таӆшуп щёрас моӆтаскем хоят ГТО норматив масат. Няӆсот пеӆа хольмаң кат хоят сорнең значок тайӆат, ветсот пеӆа хуӆам — щел ох карты, хуӆамсот пеӆа хутъяң хут хоят — бронзовый значок шитсат. Муш эӆты шукащты катхощъяң хоят сорнең ГТО значок ёша пайтсат.
ГТО маты вер эӆты Марина Николаевна Сушко пиӆан потрэмисам. Ӆув Пулңават МАУ ЦФКиС рупитаӆ.
«Ма уна ювам хоятат пиӆан рупитӆам. Камн па спортзалан уйтантыӆув. Ёшан катаӆты юхат пиӆан шушиӆыӆув, яммаӆтыты щиран ӆаӆӆув. Ӆапат кат пуш спортзал ӆыпийн зарядка верӆув. Ма хощаем ёхтыӆыты хоятӆам ищи ГТО маӆат. Норматив маты порайн вантӆа, маты хоят муй арат таӆа ювман уӆ. Кашң атэӆ группа ӆувеӆ рахты упражненияйт вераӆ», — Марина Николаевна ястас.
Там йисан, кашң вошан, кашң куртан хоятат ГТО нормативат маӆат. Щит хоты ям вер. Хухатӆыты, наварты па ништантыты юпийн, матты ки ӆыпен яӆпийӆ, ӆаварт номпсат пуңӆа манӆат. Ӆоватэнан, матты ки аяшак йиӆан.
Зоя Куртямова ханшам потар
Авторы
Лух Авт
Темы