Лух Авт
Мет оӆӊа ёхатты леккарат емаӊ хатӆ
Ун кер тыӆащ 28-мет хатаӆн мушаӊ хоятат хоща сора па мет оӆӊа ёхатты леккар хоятат емаӊ хатӆэӆ постасэӆ. Кашӊ ун вошан, ай куртан си хатаӆан хоятат яммаӆты ёх ям ясаӊан ястаӆайт, ишак нэпекан юкантӆайт, мойӆапсайн мойӆаӆайт. Там хатӆ 2020-мет таӆ эӆты постаты питса, щи ураӊна Владимир Путин нэман Партапса ханшас.
Муӊ шоши ханты хоятӆув ищи Скорой помощь хоща рупитӆат. Хойтат уншак па айшак леккарата, хойтат леккара нётты нэӊата па потарты хошап хуват айкеӆ вуты хоятата юр понӆат. Ёх па санитарата, па машина сэвс тайман нётӆат. Ӆув ияха мет оӆӊа нётап тувман иса ёхатӆат.
Хоятата нётты рупатайӆ самаӊа тайӆаӆӆы
Пулӊавт вошаӊ ёх ӆыӆ шавиман 64 хоят рупитӆат. Щи кутан Алексей Леонидович Пырысев уӆ. Кашӊ рупитты хатаӆн ӆув 15-кем пуш хонщапсая питам мохет яммаӆты яӊхаӆ.
– Ай порайн хун хуӆӆыты нёӊхалан питыӆысайм, нумассам хоты щимащ муш хонщапса этаӆ па хоӆща ёхатаӆ, — реаниматолог нэмпи леккар Алексей Леонидович ястаӆ. — Еша унашак энаммеман, так номас понтсам, леккара утаӆтыты манты па хоятат яммаӆты.
Ашкуӆа юпийн, ӆув Пулӊавт вошан леккар пеӆа 4 таӆ утаӆтыйс, еӆӆы па хоӆна Тюменской государственной медицинской академияйн 7 таӆ хащас. Щаӆта мохты, Надым вошн, реанимационной бригада хоща рупатая этас. Каматса таӆ хащаман Пулӊавта манас. Щита, 2008-мет таӆ эӆты, инты унты хоятат яммаӆман рупитаӆ. Аратӆ, ӆув хус моӆтас таӆ самаӊа тайты рупатайӆ еӆӆы туӆ. Яӊ моӆтас таӆ ӆув леккар-реаниматолог щиран мет ун категория тайӆ.
– Хоятат ӆыӆ яммаӆты па тумтака пайтты ураӊна рупатаем самаӊа тайӆэм, — ханты леккарэв потарӆ. — Кенашк па тумтака питам хоятат манэм ханшӆат, телефон хуват ям ясаӊ китӆат. Щит сам ӆыпийн мет ям амтап, хун щимащ ясаӊ хуӆӆан.
Иван Сандрин ханшам потар
Авторы
Лух Авт
Темы