Лух Авт
Мосаӆ уйтты па нумты
Там ӆапат, ай кер тыӆащ 11-мет хатаӆн, Пулӊават вош «Наследие» нэмпи библиотекаян ар хоят ияха уйтантысат. Щи уйтантты хар нэман Даниил Васильевич Китаев шуӊат 77-мет сэма питам хатӆаӆ кеша ӆэщатыса. Ӆув ханты па рущ ясӊатна ӆуӊтарат, монщат па потрат туса ханшас.
Даниил Китаев 1949-мет таӆн Катравошн сэма питас. Ӆув ащеӆ, Василий, шеӊк яма ханты йис арат, потрат уйтмаӆ па арымаӆ. Щи тумпина нарасъюхна туса нарсӆымаӆ. Тус ям арат хуӆантман Даниил щи энмас. Ай пора эӆты ӆув ӆуӊтарат ханшты питас, па щи ханшам отӆаӆ кеша умащ хорат щуртас. Хоӆна ӆув юх караӆыты па нёхарты шеӊк самаӊ ус. Унашак юваман, ӆув потрат ханшты питас па арат нарасъюхна ёттыя.
Катравош ашкуӆа 8 класс етшам юпина ӆув Пулӊаватн училище оркестровое отделение хоща утаӆтыяс. Щаӆта соӆтана морфлот хоща яӊхас. Рупатайӆ щирн округ ӆоват каш верты хотн хорамаӊ хорат ханшас, щаӆта «Октябрь» кина верты хотн ищи хорӆаӆ поныӆыяс. Щи юпина па радюва хуват ханты ясаӊна потрат тус.
Ханшты па потарты ясаӊӆаӆ акатты кеша ӆув веӆпасӆаты панат па вуӆы хотата яӊхиӆыяс. «Радио Ямала» па ханты ясӊаӊ передача «Тут суӆтам» ӆув ӆэщатам араӆ эӆты поныӆысаят. Марна опеӆ пиӆна арыяс па Ущп апщеӆ куйпна ёнтас.
– Мет олаӊан «Катравош» нэмпи ӆуӊтар ма ӆуӊатсэм хун 80-мет таӆатн ашкуӆайна утаӆтысам па щикем манэм сам ӆыпия питас, — нумаӆмиман потарӆ Светлана Бухарова. — Щишна ма номас понтсам Даниил Китаев ханшам ӆуӊтарат, монщат па потрат иса ияха акатты. Нумастэман, ищипа актам отӆам йи нэпека этӆат. Щи нэпекев «Нарасъюх» нэмна понӆэв.
Иван Сандрин ханшам потар
Авторы
Лух Авт
Темы