Лух Авт
Мосмаӊ па нопсаӊ вантапса
Кашӊ таӆ Мужи вошан уӆты, катра пормасат шавиты хотан рупитты хоятат этаӆтаты пормасӆаӆ пиӆан Ӆорвош район ай куртат хуват касаӆман яӊхӆат. Хащам ӆапат щутщаты хатӆатан Ямкурта ёхтыӆысат.
«Катра пормасат альты касаӆты онас» ёхтам порайн, куртаӊ мохет муйн альсайт, муй яӆап от кащаӆасат, каш верты хотан кущая рупитты нэ Лилия Николаевна Рочева (Куртямова) каматса ясаӊ ястас: «Муӊ хоятӆув шеӊк аматӆат, хун моӆты хорпи вантапса куртэва тутӆыӆа. Щи кеша ма мет оӆӊа айкеӆ ханшӆам, маты хатаӆан каш верты хотан муй питаӆ.
Пормас шавиты хотан рупитты хоятӆув ёхатмеӆ порайн, муӊ ӆавӆасман усув. Хатӆ сыс яӊхты хота ай няврэмат утаӆтыты нэӊӆаӆ пиӆан, ун хоятат вантапса пуншты щёсан хоӆыена ёхатсат.
Катра порайн муй хорпи веӆпасӆаты пормасат, хорам сый туты нарасъюхат, ӆуматты сохат па ёнттотат ханты хоятат верыӆысат иса вантты рахас.
Там пуш Воӆаӊ Ляль етшам пора нийӆъяӊмет таӆаӆ постаӆа. Щи вер ураӊан ун вантопса ус. Шеӊк ощхуль хуӆантты ус, хой хоятат куртэв эӆты лялясты мантсат. Тухаӆ опращат оӆаӊ пуш хуӆсаӆӆув. Катра порайн па муват эӆты ёхтам хоятат таӊха куртэван па усат.
Ёнтты ӆаращан уӆты ёнттотатан няврэмат тумпийн, ун хоятат па ёнтсат. Тухӆат ай порайн уӆмеӆан, щиты ёнтыӆысат. Хойтат па тамащ ёнттотат оӆаӊ пуш ёшан катаӆсат.
Ёхтыӆыйм мохиӆува шеӊк ун пумащипа ясаӊ китӆув. Ар яӆап потар хуӆсув, катра пора щиран верам пормасат, ляль харан уйтам нёӆат, пошканат вантсув. Моӆты порайн па ёхтыӆыяты».
Авторы
Лух Авт
Темы