Лух Авт
Муң хощаев округ губернатор мойӆатыя ёхтыӆыйс
Хащам таӆан Охсаркая яңхмем порайн щита ашкуӆа-интернат няврэмат пиӆан уйтантысам. Инщассаӆӆам, хоты ӆув уӆӆат, маты классан утаӆтыӆат.
Щи тумпийн ӆув ястасат, муя па ӆув уӆты хотэӆ «Аист» нэм тайӆ. Щи эӆты, АИСТ — щит Аксарковский интернат семейного типа. Ма ки ӆуӆан, нэмоӆты порайн щит эӆты ант па и нумасысам.
Тата ма Иосиф Евгеньевич Вэненго эӆты ханшӆам. Ӆув 1«Д» классан Охсар вош ашкуӆа-интернатан утаӆтыйӆ. Каматса ясаң Иосиф ястас, хоты ӆув хощаеӆ ӆуңан ЯНАО губернатор Дмитрий Артюхов мойӆантытыя ёхтыӆыйс.
– Муң ӆуңан Большая Хадата ёхан пуңаӆан ёра вуӆэт пиӆан касӆыман яңхӆув. Ӆув Хадата ӆор эӆты оваӆ, па Сорт ёхана йиңкӆаӆ туӆӆы. Ма ащем, ищиты, хоты ма овращӆам па ун ащиӆам, вуӆы тащ шавиман уӆ.
Ӆуңан муң хощаев округ губернатор Дмитрий Андреевич Артюхов ёхтыӆыйс. Ма ащем, па па ёх хоятат, ӆув пиӆаӆан шеңк ар потарсат там муваң уӆапса эӆты. Ӆувеӆа каш уйтты ус, хоты муң уӆӆув, рупитӆув. Ай няврэмат пиӆан ӆув ищи турамсот ёнтопсайт верыӆыйс. Ма ин уйтӆам, губернатор шеңк ар рупата тайӆ. Ма хун уна йиӆам, ма ищи губернатора йиты ӆаңхаӆаям. Ӆув итайӆ ищи хоятата нётты.
Тамащ воӆаң мойң хоят ёхтыӆыйм вер эӆты Иосиф уӆтаӆ сыс иса нумты питӆаӆӆы. Щи веран муң ӆувеӆа ястаӆув, ямас утаӆтыя, турамсот ёнтопсаята пиӆтащия, еӆӆы манты юшен кен па туң ат уӆ!
Аллина Тоярова ханшам потар
Авторы
Лух Авт
Темы