Лух Авт
Муңев олаң унӆтаты ныңев
Ма ай улмем порайна, олаңмет классна, муңев унӆтам рущ ими нэмаӆ Таисия Григорьевна ус. Муң сэңк ӆув эваӆтэӆ паӆсув. Ищимет щикем ликаң. Нэмоса порайна ант няхал, холна нях масаңна ант уллияӆ. Имосайна, муң классэвна щащканна ёвартам хор тус. Нох ӆарпитсаӆӆы, пелак понтсаӆӆы. Нявремат вантты тохи нёхамсат. Ма ищи. Таисия Григорьевнайна пасан лоңална, муңев хор этӆтасӆы. Щи хорпи хорасаң эви, матты ниӆхощъяң таӆаӆ.
Щи эвиеӆ, матты пеяӆты манмаӆ пиӆ ныңаӆ пиӆна, парта ант ёхатман. Ма щи порайна холна ант ущсам, хоты пеяӆты манты. Туп эвет пиӆна яңхсам ёхан путар пела, ай сортат пела вантты. Ёх нявремат, ай сортат, варасна рэскиӆат, ай йиңк лотат хоща. Таисия Григорьевна сэмӆаӆ нох муңхман, муң пелаев лавас, муң ёхан путар пела ант ат мантэв. Муң щи порайна веӆащ щи мостасэв, щимащ атам верат эваӆт. Юхат Таисия Григорьевна, па урок хоща таӆаң хатӆ ус. Ищи хорпи сопат, ищимет сэңк ликащман ул. Ма ущсэм щи вер, щитна щикем щалитсэм.
Таисия Григорьевна, муң пелаев лавас: «Хой ӆытӆа, ханты арна ариты? Ёсӆан нох аӆматы». Щи порайна муң, ханты ясаңна потарты ант эсӆысаюв. Класс нявремат асат сытамат. Аӆ исна, ӆув кутӆаӆна няхлат, потарӆат, итта нюр сытаман омасӆат. Манэм щикем щаль питас Таисия Григорьевна. Ма аӆ щирна, классна ултэмна сэңк еӆамты па ром эви усам. Итта па хоты йисам па, ёсэм нох аӆэмисэм. Муңев унӆтаты ими манэм вохсаӆӆы, доска хощаңна лойты партсаӆӆы. Ма пелаем керӆас па рущ ясңаӆна лавас: «Ария».
Ма класс пела аңкармасам, олаң парта эваӆт ма пелаем Лида ныйем вантаӆ. Омем яй вуӆ эви. Ма ӆув пеӆаяӆ вантман, ищимет нюр ант еӆамман Лида искантап ел аремасэм: «Лидаен Сэр Мони, Сэр Мони, Лидаен Сэр Мони, Сэр Мони».
Лида хощ еӆамса. Нявремат няхты питсат. Таисия Григорьевна па няхты питас. Сэмӆаӆ йиңкна этӆаят. Лаңкарӆаӆ, порхаӆ, па щакалең упатӆаӆ, няхтаӆ антасна асат тарыӆат. Ма щи ровна Лида искантап патэӆ моса арисэм. Лида омеӆ сэңк ям искантапат нявремӆаӆ эӆты ариӆыяс.
Ма омем ищи ям искантапат муңев арияс. Туп ӆув, муңев лавиӆыяс: «Нэмоса порайна, наңан аӆ искаӆан, елта ат исакӆайты». Ма щи ясаң нумман, щитна, Лида искантап арисэм. Таисия Григорьевна венсаӆ нэрэмияӆ нави ай щащканна, ант вериттаӆ нох волыты, щиты щи няхал. Ма пелаем ёсна парӆаӆӆы, па елащ ариты. Нявремат ищи холна амтатьӆыӆат, няхлат. Ма монщ ар ел аремасам.
Ащем, щи ар, ивейна муңев арисӆы. Порның ими ар: «Том варсы пай, ай сайна, том поми пай, ай сайна. И пуращ ики-я, и ның няврем, ай пиӆна, ляпаң-кальщаң, вериӆыяӆ. Ту, ту, ту, ту, ту». Щи арем етсас.
Нявремат хойтэт нох лойман увӆат, няхлат. Таисия Григорьевна, няхтаӆ эваӆт венс хощаңӆаӆ вурты тахайна этсаят. Ма Лида ныйем нох лояс, кимет Таящ ныям пиӆна, ма хощаем йисңан. Рущ ими ёсна ӆынан ариты партсаӆӆы. Лида Таящ пиӆна ариты питсаңан. Ӆын туп моса ики ар арисңан, яха катӆащман. Ма щи ики ар ант хуллисэм, щитна ӆын хощңанна аӆ лойсам. Щи ики рущ нэмаӆ Ефим, ханты нэмаӆ ищи щи нарна ус. Ар нэмаӆ тамащ — «Мала пулька, ай поскан».
Щиты ямас асат няхсув, щи ровна муң классэвна, директор ики, Борис Зельманович аңкармас. Таисия Григорьевна щи ики пела лавас, матты муң аритэв. Директор нях масаңна муң пелаев вантас па ким керӆас. Щи порайна ма холна ӆытсам ариты. Ена ай Ас эвием искантап ариты, туп ант ущсэм. Ӆытсэм мет такан, кутап Ас эвием искантап ариты, мет ямми таям Ас эвем. Ӆын ма опем пиӆна, манэм вантман тайсаӆӆан. Ма щи порайна, Ас эвием ханты нэмна альщисэм, Отють. Юхат рущ нэмӆаӆ, тайты питсат. Таисия Григорьевна пиӆна муң ниӆ класс етсаптасув. Йикаӆ ёхтас па вос пела мантсаңан. Юхат ивейна ма олаң учительницаем, номасна питылыяс, хоты муң ныйӆам пиӆна арисув. Хоты ма щалитсэм, муң рущ имев, щи антасна еӆамты щирем яремасэм. Щи.
Антонина Сязи (Серасхова) хансам потар
Авторы
Лух Авт
Темы