Лух Авт
Муй щирн Овс мират институт уӆ па рупитӆ
Ас нопатты тыӆащн 2025-мет таӆн Санкт-Петербург вошн уӆты Овс мират институт 95-мет таӆа питам емаң хатӆаӆ постатыя питӆа. Тата мосванан ма щи вошн усам па А.И. Герцен нэмпи Российской государственной педагогической университет хота яңхсам, мата тахая Овс мират институт ӆоңман уӆ.
Ванта, 30 таӆ моӆтас ёхӆы пеӆа ма щи тахайн па литературной факультет хоща Ленинград вошн усам па утаӆтысам. Ин па там кутатн умащ ус оша пайтты, муй щирн Овс мират институт тамхатӆ рупитӆ.
Щи ураңан ӆув куща нэңаӆ Софья Александровна Урун пиӆн уйтантысам па ямкем хув мин кутэмн потрэмисман.
– Софья Александровна, еша наң уӆапсаен эӆты матты айкеӆ муңева тува.
– Ма тамхатӆ Овс мират институт кущая уӆӆам. Там утаӆтаты тахаев катра порайт вуш эӆты А.И. Герцен Российской государственной педагогической университета ӆоңман ус. Ма, ванта, Амурской область мувемн сэма питсам па иса айтэӆн энампсам. Рутэм-щирэм эвенкат мир эӆты манаӆ. Ашкуӆа юпийн там Овс мират институтн вет таӆ сыс еӆӆы «учитель культурологии па истории» щирн утаӆтысам. Щиканща 2000-мет таӆн утаӆтаты вер тата щи сохнаптасэм. Щаӆта аспирантураем хоща па тата утаӆтысам. Юхат 2005-мет таӆэмн кандидатской диссертация нэпекем хоӆампсам па этнокультурология кафедра хоща ассистент нэ щирн мет оӆаңан усам па рупитсам. Щаӆта еӆӆы доцента йисам, кат таӆ ёхӆы пеӆа Овс мират институт куща нэңа пайтсайм.
– Муйсыр Овс мират институтн хоща ин тамхатӆ унты утаӆтыман тайӆаты?
– Муң катра порайт вушат эӆты па ин тамхатӆ унты утаӆтаты тахаева Россия мувев овс пелакн уӆты шоши мират тый утаӆтатыя вуӆув. Щи ураңан 28-кем Российской Федерация арсыр муват эӆты тый похат па эвет кашң таӆн ияха акатӆув. Иӆэм товийн аршак ай ёх ёхатӆ, кимет отэвн па еша шимаӆшак няврэм ликомӆ. Мосӆ ястатыя, хоты арсыр овс мират муң хощаева ёхатӆат. Имоӆты ишатн нганасан ёх ямкем ар ёхатӆ, тухаӆ порайн па ӆый иса антомат.
Там пуш муң хощаев хуӆам ительмен эви Камчатка мув эӆты утаӆтатыя ёхтас. Щит, ванта, шеңк ай мир. Нэмоӆты ишатн щи араткем ительмен ай ёх муң хощаев ант па ус. Щи ураңан там кутн муң туп аӆ нох аматсув щимащ воӆаң вера. Туп туняӆ таӆн институтэва 22 арсыр овс мират эӆты утаӆтатыя ай ёх ёхатсат. Мет ар хоят ӆый кутэӆн ёрн мирэв эӆты ликмас. Ванта, ёрнат хащам таӆатн арашак йисат. Щи ураңн туняӆ таӆ порайн 35 ёрн мир няврэм муң хощаев еӆӆы утаӆтатыя питсат. Кимет тахая тый ёхатты ай ёхӆув кутн эвенкат, хуӆмет тахая па хантэт ёхатсат. Мет ёхи хащам тахаята арпелак мет ай овс мират туп-туп итн муй катн питӆат.
Муң Россия мувевн, ванта, щи ай мир ямкем ар, щит: юкагират, селькупат, алеутат па па ёх. Щи тумпийн, эвенат, чукчайт, долганат, мата хоятат шеңк яма рут ясаңӆаӆн хошӆат, ӆый уӆты-хоӆты щирӆаӆ, хуӆ-вой веӆпас па вуӆы ӆаваӆты верӆаӆ туңа щира иса ин там хатӆат вуш унты тайӆат. Ма щирэмн, мосӆ ястатыя, хоты там йисэвн утаӆтаты верэӆ сохнаптатыя кематн шеңк яма рут ясаңӆаӆн ӆый кутэӆн иса потарӆат ёрнат па чукчайт, эвенат, долганат, нанайцат, ульчайт. Российской Федерация арсыр овс мув йират эӆты институтэва ай ёх утаӆтатыя щи йиӆат.
Няврэмат утаӆтаты ёхӆува-нэңӆува, аӆпа, ищиты щи хоятат ин хащсат, мата отат катра нынан Ленинград вош уӆам порайн утаӆтасат. Мосаң, па арпелак ху муй нэ пирщамасайт па антома там нови туром иӆпийн йисат. Туняӆ 2023-мет таӆн Мария Яковлевна Бармич сорма питас. Ӆув аратэӆн 90-мет таӆ ус па муңева шеңк ар онтас верас. Щаӆта па тата мосванан ищиты Нина Алексеевна Лыскова антома йис. Па ищипа муң хощаева шеңк ям ун хоятат уӆӆат па ай ёхат туңа щира па вещката там хатӆат вуш эӆты па еӆӆы уӆты-хоӆты щирэӆн сыр-сыр мосты верата иса щи утаӆтаӆат.
– Софья Александровна, муй арат няврэмат утаӆтаты ху ёх па нэңат нын иса тайӆаты, муйкем пох па эви кашң таӆ сыс Овс мират институтн утаӆтыйӆ?
– Профессорско-преподавательской тахайт хоща тамхатӆ вушатн институтн 40-кем хатнэху аратэӆн уӆ, сыр-сыр верата ай ёхӆув утаӆтаӆат. Студентат эӆты ищиты кашң таӆ сыс тата 240-кем па 250-кем пох па эви утаӆтыман тайӆув.
Арпелак ай ёх, ванта, магистратурайн па тухаӆ мортаң хоятӆув аспирантура хоща па тата уӆӆат. Щаӆта Овс мират институтэва, мата отэв А.И. Герцен нэмпи РГПУ таха хоща ханшман уӆ, муң кашащты договор нэпекат щирн ай ёхӆув па утаӆтатыя вуӆув. Ванта, кашң яӆап таӆн 50-кем бюджетной тахайн институтэв университет эӆты маӆа. Щиканща щитӆув эӆты 30-кем таха муң целевой поступления щирн ӆэщатӆув. Щёрас моӆтас заявления нэпек кашң пуш муң институтэва ай ёхат эӆты ёхтыӆыйӆ.
Туп щимащ похат-эвет муң хощаев еӆӆы утаӆтатыя вуӆайт, мата хоятат вещката па яма ӆый экзаменӆаӆ ӆэщаттыя верытсат. Ма нумастэмн, целевой щирн там пораятн ищипа кеншак муң институтэва ёхатты па еӆӆы утаӆтатыя. Щиканща мет ёхи хащам 20-кем бюджетной тахая муң Россия ӆоватан уӆты многопрофильной колледжат етшаптатыя ай ёх па тый вуӆув. Мет оӆаңан, ванта, щимащ колледжатн уӆты па рупитты кущайт пиӆан мин кутэвн и номас верӆув. Щаӆта педколледж таха етшаптаты похат па эвет муң хощаев экзаменат маӆат па тый утаӆтатыя щи сус пораятн ёхатӆат.
– Муйсыр специальность щирн нын хощайн тамхатӆ похат-эвет утаӆтаӆайт?
– Муң хощаев иса двухпрофильной бакалавриат щирн ай ёхӆув утаӆтаӆайт, щит: «рут ясаң па рущ ясаң», «этнокультурология па история» па ар щирн.
Там йисн па муң яӆап программайт ӆэщатсув, щит: «рут ясаң па китайской ясаң». Катра отат эӆты ищиты «рут ясаң па рущ ясаң» нэман тата хайсув. Щаӆта яӆап щирн па ин «этнокультурология па няврэмат дополнительное образование» таха ищи туса версув, ӆуӆан щита ай ёхӆув еӆӆы па утаӆтасайт.
Муң хощаев рупитты ху ёх па нэңат нумасӆат, хоты еӆӆы дополнительной образования верат ашкуӆаятн па мосмитӆат. Рут ясаң пеӆа таӆасты ай ёхӆув ищипа арпелак «рут ясңа па рущ ясңа» там йисн аратэӆн утаӆтатыя манӆат. Щи хоятат эӆты юхат ям няврэмат утаӆтаты мохет айн-айн тыйӆат.
– Софья Александровна, муй арат пох па эви там таӆн нын институтн ямсыева етшаптас па арсыр куртата муй вошата Россия мув ӆоватн рупиттыя манас?
– Мосӆ ястатыя, хоты кашң таӆн ищипа щи арат хатнэху, мата хоятат тата утаӆтысат, аратэӆн институт ант етшаптасат. Тухаӆ похат-эвет утаӆтаты верэӆ вощкасат па ёхи мантсат. Туп мет ошаң-щащаң ай ёхӆув тата яма утаӆтысат па диплом нэпек ёшңаӆаӆа вусат. Там пуш па аратэӆн 40 хатнэху институтэв етшаптас па Россия овс мув йирата ёхӆы мантсат. Муң хощаев, ванта, щи вер шеңк ям, хоты овс мирӆув похат па эвет мет оӆаң этаж хоща хоӆыена уӆӆат. Щаӆта па утаӆтатыя хуӆмет этажа кашң пуш нох яңхӆат. Щи вер тумпийн, ӆый уӆты овс мувӆаӆ эӆты охаң нётопсайн па кашң тыӆащ сыс иса китӆайт. Ма щирэмн, муң хощаев арсыр овс мир няврэмата ин уӆты па еӆӆы утаӆтатыя шеңк ям па умащ. Щи ураңан па щиты ястатыя вутщиӆам: «Муң хощаева еӆӆы утаӆтатыя ёхтаты!»
Владимир Енов ханшам потар
Авторы
Лух Авт
Темы