Лух Авт
Муй щирн «Тыӆащ поры» верты питса
Муй щирн па хоты Югра мувев ӆоваттыйн «Тыӆащ поры» верты питса, щи вер ураңан ма тата мосванан нэман «Торум Маа» йис пормасат шавиты хотн научной рупатнека уӆты нэ Наталья Евгеньевна Краснопеева (Новьюхова) пиӆн уйтантысам па потрэмасам.
Ванта, Ёмвошевн мет оӆаңан 2011-мет таӆ вушаӆ эӆты ӆый йис пормасат шавиты хотэӆ хоща щимащ емаңхатӆ вертыя питсат. Юхат «Тыӆащ поры» округ арсыр тахаятн хоятат порыӆыты керӆасат.
– Наталья Евгеньевна, муй щирн «Тыӆащ поры» йис вушат эӆты муң ёхӆув версат па хоты там йисн округ мувев ӆоваттыйн ӆув шоши миратн постаӆа?
– Там «Тыӆащ поры» емаңхатӆэв туңа щира па туса ӆэщаттыя ураңан ям ар хатнэху сыр-сыр вещкат па хорасаң номсат понас. Ма щирэмн, оӆаңан Нови саңхом вошаң овас хантэт йис арат-монщат акатты тахайн научной рупатнека уӆты хоятат щи вер ураңан ар юр масат.
Щиканща шеңк яма щи йис емаңхатӆ верат эӆты Тамара Романовна Пятникова арсыр наука щиратн мантыя айкеӆат ияха актас па 2000-мет таӆат пораятн Ёмвошевн ун кущайт ӆэщатам научно-практической мирхотатн сыр-сыр тусаң ӆуңтопсайт верас.
Ванта, мет оӆаңан Тукъякаң куртэӆн па Полнават вошеӆ хоща иса щимащ емаңхатӆат хантэтн верыӆысайт. Юхат щи йис верат эӆты ӆув киника эсӆас.
Хун ма 2006-мет таӆн «Торум Маа» йис пормасат шавиты хота рупиттыя ёхатсам, ищи пораятн научной рупатнекат пиӆа номасн ёхатсаюв, муй щирн щимащ емаңхатӆ тата поры щирн туса ӆэщаттыя рахӆ.
Ванта, йис хантэт туп хоттэӆ ёхӆаӆ па рут щирн тайты хоятӆаӆ кутэӆн щимащ «Тыӆащ поры» катра версат. Щитэмн рупатаем щиратн нэман Нови саңхом вош архива яңхсам, хота йис арат-монщат акатты нэңат пиӆа ияха уйтантысам па манэма мосты айкеӆат там ханты мир емаңхатӆ эӆты хоӆыева похӆа акатсам.
Щи арсыр вер тумпийн, ванта, Тамара Пятникова йис поры верат эӆты туса ханшам щират ошаңа-щащаңа там «Торум Маа» музей хотэвн ямсыева ӆуңатсув.
– Щи Нови саңхом вошаң архив хоща рупитом хоятат мет оӆаңан па, аӆпа, щимащ «Тыӆащ поры» ай кина хурата верман тайсат?
– Щимащ мосты вер Ева Шмидт шуңат ӆув пиӆэӆн рупитам нэңӆаӆ пиӆн щи ӆэщатмаӆ па муң ханты мирэва хаймаӆ.
Щиканща 2000-мет таӆ кемн ӆый Полнавта яңхмеӆ, щата уӆты йисаң-нуптаң ху ёхат па нэңат ияха акатмеӆ, «Тыӆащ поры» туса вермеӆ па емаңхатӆ манты щират ямсыева ай киная нох ханшмеӆ.
Щи ай кина хор муң ямсыева тата вантсув па артаӆасув, муй щирн поры вертыя нумассув. Ванта, мет оӆаңан Тыӆащ ӆуңхат-каӆтат еӆпийн муңев емаң пойкщаты ар мощаттыя мосас.
Ямкем хув нумассув па юхат Мария Кузьминична Волдина «Аңкем пойкщаты вер» щимащ ар щира ӆэщатсув. Ванта, ӆув ханты ясаңан ханшман па рущ ясаңа па тоӆмащтаман уӆ.
Кашң аңки ӆув няврэмӆаӆ па хоттэӆ ёхӆаӆ ураңан пойкщас па ӆаңхас, ӆуӆан Найн-Уртан ям сэмн ӆув пуңӆаӆн уӆты хоятӆаӆ ат вантсайт, тумтака па таӆаңа там нови туром иӆпийн ат усат, шукаң па вевтам вер иса ӆуӆан ант вантсат.
Щаӆта поры верты нэпекевн ханшсув, муй щирн па хун куртаң хотат хуват яңхты па хоятат эӆты сыр-сыр ӆэтотат порыӆыты пасана акатты.
Мет оӆаңан, щи порайн муңева мосас аршак йир юкана верам хотаң войиет хорасат, мата отат нянь эӆты паӆӆайт, вуты, ӆуӆан щи онтасн порыӆыты анат тэкнаптатыя.
Хун тэӆаң ан порыӆыты тахайн омасӆ, щит хатнэху номасӆ иса ям па тэӆаң. Нянь эӆты войт паӆтыя муң па юхат Татьяна Александровна Молданова хущсэв. Ӆув шеңк эпӆаң сыр-сыр йирасты хотаң войт хорасат муңева ямсыева паӆас.
– Наталья Евгеньевна, хун па нын мет оӆаң «Тыӆащ поры» вош рэп ӆоңаӆн «Торум Маа» йис пормасат акатты тахайн Ёмвош мират еӆпийн ӆэщатсаты?
– Щиканща 2011-мет таӆн, товийн, етна пелка мет оӆаң «Тыӆащ поры» муң Ёмвошн щиты версув па шоши хоятӆава туңа щира ӆувеӆ ванӆтасув, альсув.
Мет оӆаңан мир еӆпийн потартсув, муйсыр онтас тыӆащ па хатӆ най муңева иса туӆңан. Щаӆта ху ёхӆув тыӆащ пеӆа пойкащсат, ӆуӆан аршак арсыр хуӆ йиңкӆувн па аршак вой унтӆувн ат ус, яӆпа ёхатты таӆ аршак ой па амтаң верат муңева ат тус, ӆуӆан хоятат пасанэӆ иса тэӆаң па тащаң еӆӆы ат ус, еӆӆы уӆты-хоӆты щират ямсыева ат мантсат.
Юхат пирщамам нэңат «Тут ими» еӆпийн ратхарн па порыӆысат. Щиканща ху ёхӆув порыӆыты пасан еӆпийн хатӆ манты щиратн ох понтсат па ищиты тыӆащ ӆуңхат пеӆа пойкащсат па яма уӆты щират вохсат.
Туп ёхи хащам пораятн арсыр хоятат «Тыӆащ поры» пасан хоща ияха ёхатсат па порыӆыйм ӆэтотата катӆассат. Щиты айӆтыева «Торум Маа» музей хотэвн рупитты ху ёхӆув муй нэңӆув онтасн там ханты емаңхатӆэв еӆӆы округ мув ӆоваттыйн иса постатыя питса.
Владимир Енов ханшам потар
Авторы
Лух Авт
Темы