Лух Авт
Муй вер вуя – иса кум щитаӆ
Овс муван рупатайӆаӆ яма туты хоят ар. Щи хоятат, рупитты тумпийн, шоши мир уӆапса щират, рут ясаӊӆаӆ шавиты ураӊан ищи ар верӆат. Там потрэм йи щимащ нэ эӆты туӆэм. Щит Олеся Роальдовна Белова. Там ванан потрэмисман, мин кутэманан айкеӆ версаман. Щи кутан ӆув уӆапса верӆаӆ эӆты каматса ясаӊ ястас.
Тыӆтам нэ
Олеся Роальдовна эви опращ нэмаӆ Талигина. Ӆув Тыӆтам нэ, Лялькертам куртан, Тыӆтам лепан энмас. Ащеӆ — Роальд Алексеевич Талигин, антеӆ — Зинаида Ильинична Талигина эви опращ нэмаӆ Рохтымова. «Ащем, антем пенсияйн куш уӆӆатан, интам унты ӆуӊ порайн Аса хуӆ веӆты яӊхиӆыӆтан, таӆан куртанан хоӆпат опсыӆыӆтан. Ин куртан уӆӆатан, еӊк манты юпийн, Аса касаӆӆатан», — ӆув айкеӆ верас.
Айтэӆан ай Олеся ащеӆа, хота верытас, иса нётас. Еша энаммаӆан, ашкуӆая Овкурта туса. Утаӆтыты тумпийн, спорт хоща касты, ханты арат арыты, вератты — сохам эӆты сэвты, сак каратты кум па шитыӆыйс.
«Ашкуӆа етшамем юпийн, 2003-2007-мет таӆатан культурология па обществознание утаӆтаты хоята Хон Петра вошан утаӆтысам. Щи юпийн ёхи, Овкурта рупитты ёхатсам», — ӆув потартаӆ.
Рупатайӆ самаӊа тайӆаӆӆы
Ин Олеся Роальдовна Овкурт ашкуӆайн няврэмата йис пора, катра верат оша паятаӆ, история па обществознание урокат туӆ. Щи вещкат нэ рупатайӆ самаӊа тайӆаӆӆы, няврэмӆаӆ яма утаӆтыӆат. Щи вер эӆты утаӆтаты нэ каматса ясаӊ ястас:
«Ма хоӆна ашкуӆайн утаӆтымеман утаӆтаты нэӊа йиты ӆаӊхасайм. Манэман умащ ус, хоты Александра Мавровна Филиппова па Антон Егорович Лонгортов история урок тустан, щишан ищиты рупитты па нопсэм керӆас.
Няврэмӆам урокатан яма хуӆатӆат, иса нопса паятӆат. Ашкуӆа верат тумпийн арсыр конкурсатан касӆат. Ин там ванан, Ун Лялян нох питам тови кеша постам, муниципальный конкурс театральных сезонов «Я помню, я горжусь!» ус. Щита ма няврэмӆам ӆуӊтараӊ нёхты хор версат, нох питсат».
Ханты уӆапса оша паятӆат
Олеся Роальдовна ханты уӆапса туты, рут ясӊан потарты хоятат кутан энмас. Щишан шоши мир щират-пищат еӆӆы туты ураӊан самаӆ хошийӆ. Хатӆ хуват рупиттаӆ юпийн, Народный ханты фольклорный ансамбль «Щаня ёх» пиӆан ханты арат арыты па якты яӊхиӆыйӆ. Щи мохет каш верман хон мувев лап яӊхсэӆ.
Каматса таӆ сайн Олеся Белова Овкурт ашкуӆайн няврэмат «Тутые» коллектива акатсаӆӆы. Щит эӆты тамиты потартаӆ:
«Няврэмат акатты хуван номас тайсам. Ашкуӆа кущаята ястасам, ӆув кашащсат. Няврэмиет ханты ясаӊан арыты, якты, монщты аматман йисат. Ищиты муӊ ӆуӊтарат утаӆтыӆув, амамащӆыӆув. Хоӆна няврэмат пиӆан научно-практический конференцияята ханты ясаӊан рупатайт ханшиӆысув, щита па ар пуш нох питыӆысув. Щи тумпийн мастер-классат ӆэщатыӆам, ар кашн сак каратӆув, антапат верӆув, сэв сэвӆув. Няврэмӆама шеӊк каш. Щит ӆувиӆаӆа опращӆаӆ ясаӊ, уӆапса оша паятты яма нётаӆ».
Йи лотан омасты ант верытсам
Каркам нэ, муй вер вуя — иса кум щитаӆ. Олеся Роальдовна спорт хоща ёхи па ант хащаӆ. Каман касапсаятан касыӆыяӆ.
«Ма ай тэӆан йи лотан омасты ант верытсам. Ӆохан хухатӆысам, волейболан, баскетболан ёнтсам. Ин ищи щи верӆам ант вощкасӆам. Ин там ванан ӆохан хухатӆыты касапсая Пуӆӊавта яӊхсам, щита 15 километра марафонан кимет места вусам».
Ёӆан ханты ясаӊан потарӆув
Олеся Роман ийикеӆ пиӆан хуӆам няврэм энмаӆӆатан — Кирилл, Нина па Владислава. Няврэмӆан антян, ащян пеӆа вантман, каркама уӆӆат, яма утаӆтыӆат.
«Ма хун арыты яӊхӆам, эвеӊаӆам ма пиӆэман яӊхӆатан — муӊ арыӆув, ӆын якӆатан. Ёӆан ма няврэмӆам пиӆан ханты ясаӊан потарӆам. Ӆув оша паятӆат куш, муй ма ястаӆам, ёхӆы рущ ясаӊан потарӆат. Ай эвем туп еша нянь кеман потартаӆ (няхиӆыйӆ)», — Олеся Роальдовна ястас.
Валентина Рохтымова ханшам потар
Авторы
Лух Авт
Темы