Лух Авт
Мувев сайӆаман йи номасан уӆӆув
Уйт ӆор тыӆащ хащам хатӆатан округ кущаев СВО ляль харан уӆты хоятӆув пиӆан уйтантыйс. Александр Агафонов ӆаңкар куща па Евгений Супаков Герой России меваӆ посан юкантам ху ӆув пиӆаӆан щита усңан.
«Овас мувеван уӆты хоятӆув кутӆаӆан иса нётасман уӆӆат. Вера питам хоят нэмоӆты порайн утща ант хайӆа. Ин па шоши хоятӆув самӆаӆ хошиӆат па пойкащман уӆӆат ляль харан уӆты хоятӆув ёхи ӆаваӆман. Муңев уятты мосаӆ, тата уӆман, моӆты мосты пормас: ӆуматты сохат, ӆэтот, машинайт, лялясты тум пелак ёх вантман тайты пормасат, портунат, ар хорпи пошканат па нёӆат ат тайсаты. Муң па муйкем верытӆув, нётапса верэв еӆӆы туӆэв. Ёӆан уӆты хоттэӆ хоятӆан ант ёрэмаӆӆув», – Дмитрий Андреевич СВО хоща уӆты мохиӆаӆ пеӆа ястас.
Уйтантопсая ёхтам ёх, ёхӆы пеӆа ясаң катаӆсат. Хоты мушмаӆтыйм хоятата леккар хотатан яммаӆтыты, рупата каншты, уӆты атэӆ хот омасты, нётапса маты верат па ёш нэпекат ӆэщатты, иса инщассат.
Хошам хотан омасты куща нэмоӆты порайн ант питаӆ уятты, хоты шоши мир хоятӆаӆ уӆӆат. Туп тамиты, йи ещаӆ уйтантыман, йи пасан суран омасман, торӆы сэма вантман ястаман, вер еӆӆы хатаӆ. Там вер хоты таӆаң мир ӆоват шука питам атам тыш. Туп яха нётасман яха катӆащман, йи номас тайман уӆты мувев сайӆаты верытӆув.
Зоя Куртямова ханшам потар