Лух Авт
Мувев сыстамптаты вер щира рупитаӆ
Муӊ ханты шоши хоятӆув арсыр тахаятан рупитӆат. Айӆат хоятӆув нох, уншак тахаята уратӆат. Там потар шупеван Алексей Германович Куртямов эӆты ханшӆув. Ин ӆув ООО «ЭкоЦентр» хоща оӆаӊ ӆаӊкар кущая рупитаӆ.
Алексей Германович ханты хоттэӆ хоятат хоща, унт ӆор тыӆащ 1990-мет таӆан Мужи вошан, сэма питас. Ащеӆ, Герман Егорович Куртямов, Асов курт эӆты уӆ. Советской Союз порайн кина понман рупитас, щи юпийн нови тут ӆэщатман па хотат омасман, пенсий унты, рупитас. Антеӆ — Валентина Ефимовна Куртямова (Ребась) — Айвошнэ. Уӆтаӆ хуват, леккар нётты нэӊа, 40 таӆ Мужи вош леккар хотан рупитас. Ӆын кат похие па эвие вещката па ошаӊа энмаӆсаӊан. Ин па хиӆыӆаӆ энмаӆты нётӆаӊан.
Алексей Куртямов 1997-мет таӆан Мужи вош ашкуӆая манас па 2008-мет таӆан етшаптасӆы. Утаӆтыйм сыс арсыр олимпиадайт ханшас, ашкуӆа каш верты лотата яӊхас. Яма утаӆтыйм ураӊна, приоритетной национальной проект «Образование» щиран Ӆорвош район куща эӆты премияйн мойӆам.
– Ашкуӆайн утаӆтыйм урокӆам уӆтэм хуват манэм шеӊк нётӆат. Шеӊк ям утаӆтаты нэӊат манэм утаӆтысат, — Алексей ястас. — Щиты ма утаӆсам верты верӆам паты унты туты. Хон Петра вошн, 2013-мет таӆн, политехнической университет «Менеджмент организации» пеӆа утаӆтыты етшаптасам. Мужи воша мохты ёхатсам па управление социальной защиты населения хоща рупатая ӆоӊксам.
Кимет таӆн ӆув, АО «Ямалкоммунэнерго» Ӆорвош район филиал хоща, рупитты вохса. Щита няӆӆэм таӆ рупитас па 2018-мет таӆн Пулӊавта вохса. ООО «Салехардский комбинат» хоща рупитас — мир ӆоват артаӆас, тащ ӆэщатам хуӆаӊ хошапат хоӆта киттыя мосӆат.
2020-мет таӆ эӆты Алексей шоши мувев сыстапман рупитты питас. ООО «Ямал Экология» хоят пиӆан рупитты управление хоща кущая понтса. Щита яма рупитмаӆ ураӊна, 2022-мет таӆн Новый Уренгой филиал АО «Ямалэкосервис» хоща кущая рупитты китса. Рупатайӆ хоща 65 хоят ӆуӊтасман уӆ. Ӆув иса, вош нампар эӆты сыстапман, рупитӆат. Актам нампрат ияха акатӆат па машинаятан йи лота туӆат.
Самаӊа па яма рупитмаӆ ураӊна, арсыр ищканщап нэпекатан мойӆыӆыса: Тюменской областной Дума, Региональный оператор ООО «Ямал Экология», Новый Уренгой куща эӆты благодарность нэпекат. Туняӆ па, Новый Уренгой сэма питам хатаӆн, яма рупитам ураӊна, памятной карты охан юкантам. Вош куща ӆаӊкар ху, Иван Алексеевич Нефилов ястас: «Хун Алексей Куртямов ты рупитты китса, щи пора эӆты вошев сыстамшака йис — нампрат ивеван акатӆайт па йи лота туӆайт. Щи тумпийн кимет рупата щиран ӆув иса онтас па нётап вераӆ».
Рупатайӆ яма верты тумпина, Алексей Германович аӆ щиты ант омасаӆ. Ийимеӆ пиӆан хуӆам няврэм энмаӆӆаӊан. Ям верат верты ӆувиӆаӆ утаӆтаӆӆаӆ, иса патан тутӆыӆӆаӆ. Вошаӊ хоятат пиӆан уйтантыман, СВО ляль харат пеӆа нётап пормасат акатӆат па китӆат. Тампуш, Ямал мувев общественной организация «Ассоциация ветеранов боевых действий органов внутренних дел и внутренних войск России» эӆты «За мужество и гуманизм» нэмпи меваӆ посан мойӆаптаса.
Ин, Алексей Куртямов хоттэӆ хоятӆаӆ пиӆан Ростов-на-Дону нэмпи воша касӆас. Тохи ООО «ЭкоЦентр» хоща оӆаӊ ӆаӊкар кущая рупитты вохса. Ӆув па еӆӆы тумтака, ошаӊа па вещката ат рупитаӆ!
Иван Сандрин ханшам потар
Авторы
Лух Авт
Темы