Лух Авт
Мувтэӆ мир ай хопаң касопса сохнас
Щит лыпат энамты тыӆащ ёхи хащам 30-мет хатаӆан Ёмвош пуңаӆн Байбалак посӆ хоща ӆэщатман ус. Мосӆ ястаты, Е.Р. Кельмин уӆапсайӆ хуват ар юраңа-щёмаңа йиты ёх ӆэщатас. Ӆувеӆа там пуш манам ай хопаң касопса шеңк мостас.
Ӆув шеңк ӆаңхаӆ, ӆуӆн еӆӆы Югра мув ӆоватан шоши мир ай хопат верты утаӆтаты харат ат тыйсат. Округ куща ху Руслан Кухарук ястас, ям вер — щиты ат тыйӆ!
Там касопсая 200 ӆоваӆты хоят ёхтас. Щит анта туп Югра мувев эӆты касты ёх усат, щи тумпийн Россия па ванан уӆты муват: Беларусь, Казахстан, Кыргыстан, Туркменистан, Узбекистан. Па па хон пелак муват: Китай, Иран, Израиль, Морокко, Тунис, Турция па Уганда эӆты касты хоятат актащсат. Там ай хопаң касопса хуӆамкем щёрас моӆтас хоят вантты ёхтас.
Мувтэӆ мир ай хопаң касопса еӆпийн пойкащсув. Ханты нэңңан Людмила Алфёрова па Раиса Решетникова Тут имия пойк ясаң ястасңан. Еӆӆы Сурханӆ мув ханты икет Данила Покачев, Андрей Ачимов па Михаил Кечимов Йиңк урт икия пойкащсат, ӆуӆн ям туром ат ус, ӆуӆн Асн, Ӆаңаӆн па ёханатн ям арат хуӆ, утнтан ям арат вой ат ус, ӆуӆн мир яма ат ус. Щи юпийн хатӆаң хатӆа щи йис.
Округ куща юкана уӆты ху Руслан Кухарук уща верас:
– Шеңк ям, ай хопн ӆоваӆты ёх щи касопса еӆӆы туӆат. Ванты, йистэӆн шоши мир ай хопатн хоӆпат вантты яңхсат. Муңева щи вер и номасн еӆӆы туты мосӆ. Муң мойң ёха шоши мир йис уӆапса эӆты умща потартӆув. Шеңк ям, муң мувева па хон пелак муват эӆты касты ураңан ӆухсат ёхатсат. Муң урңева мет воӆаң — щит шоши мир йис уӆапса, верат па рут ясңат ӆаваӆман тайты.
Ай хопатн касты ёх, сорашак финиша ёхтаты! Щи юраң-щёмаң ёх емаң хатӆ вантты ёх, нынана умща вантты ат питӆ!
Мувтэӆ шоши мир касопсэт туты таха куща ху Алексей Кыласов уща верас:
– Нын пеӆана вантмемн ма оша пайтсам, нын яна па там касты емаң хатӆ мосман тайӆаты. «Ай хопаң касопса» — щит Югра мув ӆыӆ! Кашң таӆ тый аршак мойң хоят ёхатӆ. Ванты, ӆыв оша верӆат, муй щирн нын йис вер еӆӆы туӆты. Нын пеӆаян вантмеӆн ӆыв утаӆтыӆат, муй щирн йис верат шавиты па еӆӆы туты мосӆ.
Мет сорайң 37 ики кутэӆн ай хопатн кассат. Щаӆта оша йис, ёхи хащам тахая оӆаңмет Сергей Русскин (Сурханӆ район), кимет Иван Покачев (Сурханӆ район), хуӆмет Юрий Казамкин (Нижневартовской район) ёхатсат. Имет кутн пар сора Наталья Тэвлина (Когалым вош), щаӆта Галина Мултанова па Лидия Покачева (Сурханӆ район) ёхатсат. Ӆыв Югра мув юкан куща ху Руслан Кухарук эӆты мевӆ посат ёша вусат.
Мевӆ посат маты артан хунты ай хопаң касопса ӆэщатам ху Анатолий Кауртаев округев юкан куща уӆты хуя Руслан Кухарука ӆуп мойӆаман ястас:
– Югра мувев шоши мир эӆты наңена ӆуп мойӆаӆам, ӆуӆн наң ар таӆ Ас па Ӆаңаӆ хуват куща ху иты туңа ат яңхсан!
Руслан Кухарук ястас, ӆуӆн Нижневартовской район верантты ёх Минпромторг хоща грант нётопса ох ат вохсат, ӆуӆн еӆӆы щи ох онтасн ай хопат верты утаӆтаты вер ӆэщатты.
Щи юпийн еӆӆы арсыр ӆоват хатнэхоятат кассат. Ай хопатн мет каркама Сурханӆ район хоятат ӆоваӆсат — 15 сыр-сыр касопсэтн ӆапат хоят нох питсат. Кимет — Нижневартовской район, хуӆмет — Нефтеюганской район касты ёх усат.
Мет умащ ус вантты, муй щирн па хон пелак касты ёх кутэӆн кассат. Ӆувиӆаӆа муң шоши икиӆув нётсат. Ветсот метра хуватан щиты ёхатсат:
- Бурак Гюмюшлю (Турция) па Виталий Русскин (Русскинской курт);
- Абделхафидх Лухиши (Тунис) па Юрий Казамкин (Нижневартовской район);
- Есения Черепова (Казахстан) па Эдуард Иуси (Нижневартовской район).
Ай хопаң касопса порайн арсыр харат рупитсат. Кашң мойң хоят верытас: овас мир касопсэт эӆты оша пайтты па касты, щи тумпийн ёшн мосты пормасат верты, арыты-якты ёхн ӆэщатам хотат вантты.
«Торум Маа» музей рупатнекат нюки хот омассат па щий мойң ёх вохсат, ӆуӆн ӆув шоши мир уӆапса эӆты оша ат пайтсат. Щита ӆув арсыр пормасат версат, номпсаң ёнтопсэтн ёнтсат, эпӆаң ӆэтотат ӆэсат.
Ёхи хащам артн етнхот ус. Щиты амтаңа ай хопаң касопса сохнас. Па ӆуңан па щи ӆоваӆты ёх касты щира мойңа вохӆув.
Людмила Шульгина ханшам потар
Авторы
Лух Авт
Темы