Лух Авт
Нэӊхэт лечитмаӆ томпына самаӆ ар пеӆа хойс
Татьяна Гавриловна Ендырева сэмна питам па энмам муваӆ Суп ёхан сыӆна Катравош хощаӊна ол. Ащеӆ Гаврил Алексеевич Тарымов олмаӆ хуват совхозан ропытас. Амэӆ Мария Ивановна Ковшина ротӆ Вандиязы ханты курт эваӆт манӆ. Аратэӆна ӆув хаттэӆэӆна холамхощъёӊ няврем ос, ӆув мет ялта. Арпелак, ай олман антамми йисат.
Ашкоӆа етсамаӆ юпина, Татьяна Гавриловна Пулӊавт медицинской училища етсас па Приуральской район Охсар похална олта манас. Щита ӆув леккар хатна ропытта питас. Аратэӆна ниӆъёӊ таӆ ай леккар ропата верас. Итта пенсина ол.
Нэӊхэт лечитмаӆ томпына, самаӆ ар пеӆа хойс. Арат па монщат пиӆна Татьяна Гавриловна Ендырева олтаӆ хуват лохсаӊа ол. Йис потрат па монщат ай тэӆна ащеӆ эваӆт холантас, амэӆна па хорам ханты аратна ариса.
Вуӆӆы ювмаӆ юпина, ӆув ищи амэӆ па ащеӆ иты арийӆ, мала кем арат ай олмаӆ пора эваӆт номал, ар пелак ар щираӆна хансаӆ.
«Ма ай тэӆна ариӆам, номсамна хыщас хоты амэм арийс, ма па вуӆӆы ювмем порайна, самам иёлты арита ӆытас. Арат ханста 1993-мет таӆ эваӆт питсам, арӆам ханстэмна — ёр Овс мув хорам тахайт, Кев, щита касӆыты нэӊхэт, хаттэӆ нэӊхуӆам, нявремат, энмам мувам, мув хорас, самамна омащ похлам, щиты ванна олды Ас эваӆт вуӆам. Айна-айна хансантман итта мули ветъёӊ молтас ар ханссам.
Щиты олман ма ханты арат ариты «Овс мув нэ» группа хоща арита вахсайм, айӆта ныӊӆам пиӆна ариты арат ханста питсам. Муӊ ивейна Охсар похал емаӊ хатӆатна нэӊхэт ораӊна ариӆу, Ӆорвош районна яӊхлу. Камантсы пус Пулӊавтна шоши мир нэӊхэт ораӊна верты емаӊ хатӆатна пиӆтащису. Щимащ уйтантопсайт етсаты юпина, «Сборники песен народов Севера» этӆат. Ӆапатмет пус этам сборника ма хансам арӆам лоӊсат «Ворӊа ими», «Амы пущщи ар». Щи томпына йи матты номера вуӆ апэм хансам ар па муӊ хаттэӆу йис потрат ищи щита лоӊсат. Холна, самамна сэӊк хасам, щи сборника касӊ автор, фольклорной коллективат, солистат пущщи еса хаснман ол, нэӊхэт сборник ясна вутэӆ порайна, ощта масӆат хой хансам арат ӆуӊатта питӆат. Холна сэӊк ӆытӆам ма хансам арӆам щирам диск хоща ӆэщатта.
Итта лолан энмам мувӆамна яӊхта. Маса хонды кепа веритӆам щи питта, итта щит топ ма эваӆтэм лайӆ. Самам хонды такан ки ӆытта питӆ, аӆт яӊхлам», — Татьяна Гавриловна лавас.
Алаӊ ийикеӆ Олег Никифорович Кельчин Афганистанна манам ляльна парас. Сэмна питам па энмам муваӆна туса па щита щамаӆтса. Ӆув эваӆтэӆ кат йикаӆ хыщас Андриан па Олег. Вуӆ йикаӆ Пулӊавтна ол па ропытаӆ. Ай йикаӆ Белоруссия — Брест васна маныӆыйс.
Ай похална ныӊ эӆты отща олта щёкат, йиӊк масӆ, юх масӆ, щитна ӆув киметты ях хоща манас. Щиӆта кат эви тайс. Аратэӆна Татьяна ниӆ няврем энмаӆтас.
Итта Татьяна Гавриловна ветхощъёӊ хиӆы энмаӆта нятаӆ, хиӆыӆаӆ Кев сыӆ ханты ясаӊ пеӆа онттаӆӆы. Йикӊиӆаӆ мостаӆӊан кепа, топ лавта няӆамӆан ант керӆаӆат. Щи лампа омащ ясӊу ант таптаӆ ораӊна энамты нявремат пиӆна ханты ясаӊна потартта масӆ.
Татьяна Ендырева лавты ясаӊна, сэӊк ям Охсар похал ашкоӆайна нявремат ораӊна ханты ясаӊ урок туӆа.
Анта топ аритаӆ па арат ханстаӆ ораӊна майӆаптаӆа, ай леккарра ропытам таӆӆаӆ ораӊна ищи майӆапсэт тайӆ.
Вера Лонгортова хансам потар
Авторы
Лух Авт
Темы