Лух Авт
Нёхи па хуӆ нёхарты касты хар верыӆыса
Ветмет пуш Яр-Сале куртан ун касты хар верыӆыса, хота мет яма, каркама па хорамаңа няр хуӆ па няр нёхи нёхарты хоятат пирысайт. «Ямальская строганина — 2023» касты хара Тюмень па Пулңават вошңан, Приуральской, Шурышкарской, Тазовской районат, Панаевск, Сеяха па Яр-Сале куртат эӆты яң хоят кастыя ёхтыӆысат.
Касты верэӆ хуӆам ята шупиман ус. Мет оӆңа няр нёхи, щи юпийн няр хуӆ нёхарты мосас, щаӆта хорамаңа ӆэщатам анӆаӆ рупатайт пирыты хоятата альсат.
Тащ нёхрам хуӆ па нёхи анат пирыты воӆаң ӆэтот кавартты хоятат ёхтыӆысат. Наталья Трапезникова хон мувеван мет ям щутщаты па тынаң ӆэтот ӆэты хотан рупитты куща нэ. Унт вой нёхи эпӆаңа шарытты па кавартты хошаӆ. Святослав Спиваков Екатеринбург вошан «Рататуй» ресторан хоща резидента уӆ, «Молодые ножи» каш альты касты харан нох питас. Винченцо Драго — Хон Петра вошан итальянской ӆэтот верты хот тайӆ, ӆув анта туп мохет верам рупатайт пирыйс, ӆув ищи вуӆы нёхи эӆты ӆанта ёвартам ай хатань паӆат ӆэщатас. Касты хара ёхтыӆыйм мойң хоятат тащ верам эпӆаң ӆэтотат ӆэты верытсат.
«Нёхрам няр нёхи» номинация хоща Надежда Худи, Яр-Сале курт эӆты оӆаң тахая этас. «Нёхрам потам хуӆ» номинацияйн Надежда Рохтымова Тазовской район эӆты оӆаң места шитас. Нох питам нэңңан сот щёрас соӆкува сертификат нэпекатан мойӆаптасайңан. Денис Климов Белоярск курт эӆты народной голосование щиран «Мет хорамаңа ӆэщатам ӆэтоты ан» нэпекан юкантса.
Пулңават вош эӆты касты хара хуӆам хоят яңхас. Ӆув кутэӆан Марина Матвеева — нэпекат ӆуңатты хотан рупитты нэ ястас: «Антем-ащем хантэт па ма ай тэӆан нёхрам хуӆ па нёхи ӆэты па ӆэщатты хошӆам. Ӆэтоты анэм хорамаңа ӆэщатмем порайн соӆ пиӆан уры ан па тайсам. Катра щиран вуӆы ур сыстама лёхитам щуш хир ӆыпия понӆа па щита соӆытӆа. Хун муң хуӆ па нёхи нёхартсув, рупатайт пирыты хоятатан яма вантсаюв, щаӆта па таӆаңа етшам рупатайӆув пирысайт. Тамащ касты хара ма оӆаң пуш яңхсам, хуӆ-нёхи туса нёхарты хоятат рупатайӆаӆ вантсам, еша утаӆтысам, нётты ясңат хуӆантсам. Па ишан яӆпа тамащ касты хара па яңхты рахаӆ».
Зоя Куртямова ханшам потар
Авторы
Лух Авт
Темы