Лух Авт
Нэпекат ӆуӊатты вер муӊ хоятӆува мосӆ
Хащам ятан, Сорханӆ Централизованной библиотечной таха куща нэ Яна Юркевич киникайт ӆуӊатты хотан уӆты па рупитты хоятат эӆты манэма мосты айкеӆат верас.
Мет оӆаӊан ӆув потартас, хоты туп хуӆам таӆ сыс там тахайн кущая уӆ. Иса 1996-мет таӆ вуш эӆты Сорханӆ вош киникайт ӆуӊатты хотн рупитты питас. Ӆув аӊкеӆ-ащеӆ, ванта, уӆапса хуватн мув иӆпи тащат каншты щирн усӊан па рупитсаӊан. Щи вер ураӊн Яна айтэӆн Советской Союз хон пелак арсыр вошатн ус, энмас па ашкуӆаятн утаӆтыйс. Ӆув ясаӊӆаӆ эӆты оша йис, хоты Чукотка мувн ӆый па усат. Щи порайн Яна кутоп ашкуӆайӆ веӆщи етшаптас.
Щиӊанща номасн ёхатса па Москва хон вошн культура институт хоща еӆӆы «библиотечной вер» факультетн утаӆтыйс. Щи вераӆ сохнаптамаӆ кемн ӆув диплом щирн «библиотекарь-библиографа» ханшӆтаса. Еӆӆы ма инщассэм.
– Яна Борисовна, муй щирн наӊ Сорханӆ воша ёхатсан па рупата мощатсан?
– Институт етшаптамем юпийн, ванта, хоттэӆ хоятаӊа йисам. Икем Сорханӆ вош эӆты ус па ӆув манэм тый тусӆы. Мет оӆаӊан ма там вош ант па уйтсэм.
Щиты 1996-мет таӆн Сорханӆ вош А.С. Пушкин ики нэмпи воӆаӊ киникайт ӆуӊатты хота библиограф нэ щирн рупиттыя щи вусайм. Щи порайн, ванта, тата Централизованной библиотечной таха пуншман ус па ӆув куща нэӊаӆа Надежда Васильевна Жукова рупитас. Туп тата щи нэ аратэӆн 38 таӆ кущая ошаӊа-щащаӊа ус. Щи йисн ма ант па нумассам, хоты ма, ӆув итэӆа, ищиты там тахайн кущая йиӆам. Кашӊ ай па уншак вер рупатаем щирн туӊа щира ӆэщатсэм. Щаӆта щи порайн иса нэпек хуватн муӊ рупитсув. Муйсыр мосты вер хоӆыена нох ханшсув. Электронной каталог ант тайсув па там библиотека хотэвн хуӆам компьютер туп ус, щитатн ищиты япсыена ант хошсув. Кашӊ журнал муй киника нэпекаӊ каталог хуватн каншсув па юхат веӆщи ӆувеӆ инщастыя хатнэху ёша катӆаптасув. Там йисн, ванта, па щирн щи рупитӆув.
– Муй арат хоят там хатаӆн аратэӆн там тахайн хоща уӆ па Сорханӆ вош хуватн рупитӆ?
– Тамхатӆ Сорханӆ вошев хуватн аратэӆн 13 киникайт ӆуӊатты хот тайӆув, тухаӆ тахаята няврэмат па кимет отата уна ювам хоятат кашӊ хатӆ сыс иса яӊхӆат па ӆыеӆа мосты нэпекат ёша пайтӆат. Щиӊанща вошаӊ библиотека хотатн таӆаӊтэӆн 177 хатнэху арсыр рупатайӊ верат ӆэщатман уӆ па арсыр мир пиӆн рупитӆ. Мет яма там йисн киникайт ай похат-эвет ӆуӊатӆат, мата няврэмат 14-мет таӆ вуш ӆовата туп йисат. Щитат тумпийн, мет ай няврэмиет па аӊкиӆаӆ-ащиӆаӆ пиӆн муӊ библиотека хотӆува яӊхиӆыӆат, хун сыр-сыр ванӆтопсайт уӆӆыӆат, тата рупитты нэӊат нэпекат хуватн спектакль щиратн ӆэщатӆат.
Муӊ няврэмӆув рущ муй ханты монщат хуватн арсыр хорат ханшты щират па тайӆат. Шоши мир хоятат эӆты шеӊк ар айкеӆ тата туӆув, кашӊ ай па ун хоята муӊ библиотека хотӆува яӊхты шеӊк умащ. Ма щирэмн, киникайт ӆуӊатты вер муӊ ёхӆува-нэӊӆува куш катра, куш там кутн шеӊк мосӆ!
Владимир Енов ханшам потар
Авторы
Лух Авт
Темы