Лух Авт
Нётапса вер ӆаварт ант уӆӆыйӆ
Кашӊ хоят, хой муй щиран верытаӆ, СВО харан уӆты хоятӆува нётапса вераӆ. Ун кер тыӆащ оӆаӊмет хатӆатан округеван Народной фронт хоща пиӆтащам ёх, щиеӆ пеӆа машинайт китсат. Китты нётапсайт кутан тами мет ун нётапса.
Щи хатаӆан муӊ Иван Сандрин пиӆан уйтантысув, ӆув щи вер хоща ищи нётапса юр понас. Щит эӆты ӆув каматса ясаӊ ястас: «Ёӆан уӆмеман, Эдуард Хабэчевич Яунгад телефон хуват ма пиӆэман потрэмас. Ястаӆ, Мужи вошан машина тыныӆа, яӊхты мосаӆ, вантты. Машинайӆ ям ки, ӆутты па Пулӊавта туты. Яӊхсам, инщассэм. Машина тыныты хоятэм Евгений Петухов ястас: «Машинаем Горка вошаӊ хоятан ӆутӆа». Ма па ястаӆам, там УАЗ-буханка машинаен ӆутты вутщиӆа па ляль манты харат пеӆа китты. Щитаӆан ин куртаӊ хоятэм мохты кашащас. Тынаӆ тынӆышак верман, пормасаӆ масӆы. Нэпекӆаман ӆэщатсаман па яӆап вер этас, ӆутам машинаев воша туты мосас. Ин машинаев тыныйм хоятэм ястас: «Щиты ки, щутщаты хатӆатан воша яӊхӆам па ӆувеӆ ёша-кура ма щи тохи туӆэм».
Машина тумпийн, там йисан ляль харан тайты тохӆаӊ хошапат моштаты ураӊан, пормас па ӆутсув. СВО харан уӆты ур пох айкеӆ китас па щимащ пормас вохас. Щи еӆпийн ит китыӆысув, мосты вер хоща яма рупитаӆ, щит ураӊан щимащ пормас хоӆна па вохса. Тащ хотан яӊхты хоятӆув эӆты вуӆы сохат ӆутсув, тухӆат сох щиты масат. Ӆыӆаӊ хоят паратты ураӊан канштыйн, вуӆы сохан лаӊкисыйм соӆтанӆув ант моштаӆайт. Мува понман, эӆты омасты ищи сай па хошам.
Пулӊават вошан ёра вер туты хоятатан актам машинайт яма вантсайт, ӆэщатсайт, войн, тут йиӊкан понтсайт. Верам рупатаеӆ сахат тын ант вусат. Карты юш хоща рупитты ёх айкеӆ хуӆман, ищи муӊ хощаев пиӆтащсат. Манты юш мет хув кутаӆ, актам машинайт карты юш хуват яӊхты тутаӊ хопа ӆэӆсайт па тусайт. Щиты яха пиӆтащман, йи ай вер версув», — Иван Сандрин ястас.
«Ма ар пуш ляль харан уӆты ёх пиӆан уйтантысам, потрэмисам. Муй пормас мет мосаӆ, иса инщасӆаӆӆув. Ляль хара китты машинайт мосты пормасатан тэкаптасайт. Портунат, машинайӆаӆ ӆэщатты карты шупат, оӆты щира верам хират, лаӊкисыты сохат, эӆ па венш лёхитты пормасат, хуӆ-нёхи хошапат, муй иса шоши мувеван уӆты хоятат акатсат, нётапса китты тахая тусат.
Тухаӆ мосты пормасат шеӊк тынаӊат па аӆ ӆапкаятан ант ӆутты. Щи вер ураӊан мир хоятӆув яха понасман ох акатӆат.
Ай няврэмиет щуртам хорат, ашкуӆайн утаӆтыты эвет-похат ханшам письмайт ищи китам пормасат кутан усат. Щит хоты мет воӆаӊ нётапса. Паӆтап ант тайты ун икет, няврэм ханшам потрат сэм йиӊк муӊхман ӆуӊатӆат. Уӆты тахайӆаӆан, ай пошхиет щуртам хорат тахартман тайӆат, кашӊ хатӆ умащӆыман щиеӆ пеӆа вантӆат. Муйкем самен так, щит хоты шеӊк ӆаварт. Ёӆан уӆты хоятат, СВО манам ёхӆув, хоӆыена йи номас туп тайӆув, ляль сорашак ат етшаӆ, хоятӆув ӆыӆӊа ёхи ат ёхатӆат», — Ямал мув Законодательной Собрание депутат Эдуард Яунгад ястас.
Зоя Куртямова ханшам потар
Авторы
Лух Авт
Темы