Лух Авт
Нянь сораӆты пора
Тащ хотан яӊхты хоятат ӆуӊ хуват вошат эӆты хуван уӆӆат. Щишан ӆув ӆуӊ уӆты тахайӆаӆа каматса тыӆащ ӆэты арат ӆэтот патан вуӆат. Нянь — щит мет воӆаӊ ӆэтот. Ӆуӊ кеша патан ар нянь тутӆыӆат, таӆаӊ ват ухаӆ, мосаӊ па кат ват ухаӆ.
Нянь, уӆтыйн, сора хишиӆыӆа. Щишан тащ хотан касӆыты хоятат товийн няньӆаӆ сораӆтӆаӆӆаӆ. Ин ӆув вошат эӆты хува касаӆсат. Вуӆыӆаӆ омасты порайн, уӆты хотвоӆӆаӆан, нюрматан няньӆаӆ сораӆты питсат. Нэӊат нянь ващӆат, няврэмӆаӆ ӆувиӆаӆа нётман нянь лакки понӆат. Кашӊ нянь ващ йи пуӊӆа, йи эӆты ант ат питӆат — щиты, ванты, яма сорӆат. Нянь понты ураӊан, муй арат парщин лопас тайӆат, хоӆыена лакки понӆаӆӆаӆ, ул ухаӆ кеӆан таӆӆа. Нянь кат-хуӆам хатӆ турам найӊ сораӆтӆа ки, яма йиӆ. Ерта ки ювемаӆ, лап лаӊкӆаӆӆаӆ, хой нянь ващӆаӆ нох актапӆаӆӆаӆ.
Щаӆта няньӆаӆ сортэӆан, акатӆаӆӆаӆ, няни ват ухӆа ӆэӆӆаӆӆаӆ, ващӆаӆ ант ат шукаӆаӆат. Касаӆтыйн ант ат морӆайт, иӆта па эӆты карсох лопасан понӆаӆӆаӆ, хушӆаӆӆаӆ. Щиты Овс мув шоши хоятӆув мет воӆаӊ ӆэтотэӆ шавиӆэӆ.
Валентина Рохтымова ханшам потар
Авторы
Лух Авт
Темы