Лух Авт
Няврэм леккара рупитты нэ
Там таӆ округеван яммаӆтыты па таксарӆаты Таӆа постаман уӆ. Сишан таӆ сыс аршак леккар хоятат эӆты ханшты питӆув. Уӆӆат симась леккарат, хойтат шеӊк сэма ант хойӆат. Хун наӊ, мосаӊ па рут хоятэн леккар хота понӆа, си порайн ӆувиӆаӆ шияӆаты рахаӆ. Ханты хоятӆув кутан симась хоятат па уӆӆат. Там лопасанан йи симась ханты нэ эӆты потрэм туӆэм. Сит Марина Прокопьевна Максарова.
Ур хотан энмас
Марина Прокопьевна Пулӊаватан уӆ. Ар таӆ ЯНАО клинической леккар хотан няврэм леккара (педиатра) рупитаӆ, няврэмат яммаӆтаӆ. Педиатрической отделение куся нэӊа, медицинской наук кандидата уӆ. Мет ун квалификационной категория тайӆ. Ӆув эӆтэӆ каматса ясаӊ ястас: «Ма ар таӆ Пулӊават вошан уӆӆам па рупитӆам. Емаӊ хатӆатан, сютсяты хатӆатан иса рупатайн.
Ур хотна энапсам. Ӆапат таӆ унты ханты ясаӊан туп потартсам. Ашкуӆая манмем порайн, русь ясаӊ ант уйтсам. Оӆаӊ классан туп кат тыӆась усам. Си пора сыс азбука утаӆтасам. Нийӆмет класс Питӆор куртан етшаптасам, ихосьяӊмет — Ӆорвошан.
Аӊкем-асем касӆыман яӊхсаӊан. Асем Прокопий (Поронь) Герасимович Максаров. Аӊкем Анастасия Архиповна Максарова. Тампуш нийӆъяӊ пеӆа вет таӆа йис».
Утаӆтыты порайӆ
Ханты нэӊев экономиста утаӆтыты утсийс. Туп манты юшаӆ па сирн манас, леккара йис. Сит эӆты потраӆ ситы тус: «Ма си пеӆа нумасман ант усам. Леккара рупитты номас ант тайсам. Си порайн шоши мир ёх департаментан моӆты программа ус. Па вошатан утаӆтыты утситы няврэмат яха актыӆысайт. Экзамен маты па вошата тутӆысайт. Амуй йи няврэм си порайн ант ёхтас. Сишан ма вусайм. Аттестатэм вантса, туп вет па няӆ посат усат.
Москва воша тусаюв. Сита экзаменӆам масӆам па ун вошан хасьсам. Катхосьяӊ таӆ утаӆтысам. Оӆӊа медицинской факультет етшаптасам. Сяӆта няврэмат лечитты тахая мантсам. Кат таӆ ординатурайн, хуӆам — аспирантурайн. Си юпийн округева рупитты китсайм».
Хус моӆтас таӆ йи тахайн рупитаӆ
Леккар нэӊиев утаӆтыты етшамаӆ юпийн, мохты Пулӊавта ёхтас. Рупитты отделенияйн веӆси сэма питам щущиет эӆты нийӆхус таӆ ӆоват унты эвет па похат яммаӆӆайт. Рупатайӆ эӆты тамиты потартас: «Хус моӆтас таӆ окружной леккар хотан няврэм отделенияйн рупитӆам, педиатра уӆӆам. Утаӆтымем порайн па рупитсам. Пиӆ хоятэм иты учёной нэм тайӆам. Ма медицинской наук, ӆув — филологической.
Ийикем — Олег Прокопьевич Сюгней. Ӆув округев хуват яма уятӆа. Нийӆхус моӆтас таӆ шоши мир ёх департаментан рупитас. Хуӆам няврэм тайӆаман. Атэӆ мин уятӆайман, яха па ант вантыӆысайман. Емаӊ хатӆатан яха яӊхтэман, хоятат вуся верӆат па инсясӆат. Нын па муя яха яӊхӆаӊан? Ӆув наӊена хой?»
Самаӊа тайты вераӆ
Марина Прокопьевна рупатайӆ самаӊа тайӆаӆӆы. Хун кашаӊ няврэмат мушӆаӆ эӆты яммаӆӆат, шеӊк аматаӆ. Мосты туты вераӆ эӆты ситы ястас: «Йи хатӆ иты таӆат манапсат. Си пора сыс муй арат няврэм муш эӆты лечитсув. Полсяӊ, хуӆ, ох каши пиӆан ант рупитӆув. Соматической мушат яммаӆӆув. Муӊ отделенияеван арсыр муш пиӆан няврэмат оӆӆат: сый оӆаӊ, вур, сам, сахарной диабет мушат, охан па эӆ ӆыпийн энамты пувӆапсайт, лон таӆты, щах раканты. Там пора энамты эвет па похат давление тайӆат, инсультат тайты няврэмат па уӆӆат. Муйн ун хоятат мушитӆат, няврэмат иси симась отан кашитты питсат. Кашаӊ няврэм тэӆыя, рупитты хоят шимаӆ.
Рупатаева сикуш леккарат мосӆат. Кашӊ таӆ нэпек китӆув. Моӆты хоят ки вуӆат, туп хон мув вошат эӆты ёхтам леккарат. Хотан маӆайт, охан сохаптаӆайт. Муӊ хоятӆув па нэмоӆтыйн.
Хоӆна ястаты утсиӆам, там пора няврэмат ӆув сирэӆан энамӆат. Аӊкиӆаӆ-асиӆаӆ ӆув верӆаӆ верӆат. Эвет па похат атаӆан хув иӆ ант оӆӆат, иса телефон пеӆа вантман, хусаӊа, охӆаӆ поӆтаӊа йиӆат. Сит эӆты охӆаӆ кашет, давление нох манаӆ. Ӆэты ӆэтотӆаӆ па ар хорпи нёӊхалан ӆыӆатман уӆӆат. Сит эӆты камн хорпи мушат этӆат.
Няврэмата каман аршак шушиӆыты, ёнтты, хувшак оӆты, яма ӆэты мосаӆ. Аӊкиӆаӆа-асиӆаӆа эвиӆаӆ-похӆаӆ пиӆан аршак пора хайты. Си порайн шимаӆшак муш питаӆ. Тумтак ёш, тумтак кур».
Марина Прокопьевна, наӊ воӆаӊ вер верӆан. Еӆӆы пеӆа тумтака уӆа, самаӊа, мосмаӊа тайты рупатаен еӆӆы туви. Мушаӊ няврэм шимаӆшак ат уӆ.
Альбина Тырлина ханшам потар
Авторы
Лух Авт
Темы