Лух Авт
Няврэм пеӆа самаӊ нэ
2024-мет таӆан ветъяӊ таӆа йис, хоты ярхус таӆпи эвийн ӆув ай няврэмат хатӆ сыс шавиты хота рупитты ёхтас. Щи пора эӆты энмаӆтам няврэмӆаӆ нови охпи хоятата йисат, пенсияя мантсат па хиӆыӆаӆ энмаӆӆат.
Щёхар тыӆащ хащам ӆапатан ай няврэмат хатӆ сыс шавиты хотан рупитты хоятат емаӊ хатӆ постасат. Там лопасан Светлана Серафимовна Тыликова (Контерова) эӆты потар манаӆ. Ӆув Овкуртан, ин там хатӆ унты «Теремок» ай няврэмат хатӆ сыс шавиты хотан воспитателя рупитаӆ.
Ашкуӆайн утаӆтымаӆан, утаӆтаты нэӊаӆ ӆув пеӆайл ястаӆ: «Ванта муй щиран наӊ хошӆан няврэмат моӆты вертыя па ёнтты хущтыя, потартэнан ¬– турсыен ӆэпат, няхен луӊханщап иты щулийӆ. Наӊен ӆуӆан ай няврэмат пиӆан рупитты. Топоӆ вошан щимащ рупата пеӆа утаӆтыты хот уӆ». Ин утаӆтаты нэӊаӆ ястам ясаӊ щиран, нийӆ класс етшамаӆ юпийн, Мужи вош кат пуш вантыйм эви, Топоӆ воша рупата пеӆа утаӆтыты манаӆ. Ант па паӆмаӆ щи хуват тахая манты.
Рупата пеӆа утаӆтыты таӆӆаӆ сора хащсат. Яха утаӆтыйм пиӆнэӊӆаӆ арсыр вошата рупитты мантсат. Нэпек ёша пайтам эви ёхи ёхтас. 1972-мет таӆан уйт ӆор тыӆащан «Теремок» садика рупитты вуса. Веӆщи рупитты питмаӆан, ай няврэмата ӆаварт ус Серафимовна ястаты. Ӆув ӆувеӆ Светлана Ивановная аяӆты партас. Там йис няврэмат еша харщаӊат па ар щира тыйман ищи па Серафимовна ястаӆат, ай пошхиеӆаӆ па ун антия аяӆӆэӆ.
Рупитмаӆ кутан, яӊ таӆ сыс садик куща нэӊа ус. Юхат, айшак нэ ёхтам юпийн па воспитателя еӆӆы рупитты питас. Хоятаӆ атам ки, ай няврэм вана хун йиӆ. Рупатаяӆан, оӆаӊ таӆ энмаӆтам няврэмӆаӆ воӆаӊ хоятата йисат, ин па хиӆыӆаӆ ӆув хощайӆ ванӆтаӆӆаӆ.
Ийикеӆ Павел Иванович уӆмаӆ хуват ашкуӆайн рупитас. География урокат тус па интернатан воспитателя рупитас. Анта нэман, щиты тыйс: Светлана Серафимовна мет оӆаӊ, садик эӆты эсӆам няврэмат, юхат ашкуӆайн, Павел Иванович ёша питӆат. Щиты яӊмет класс унты щи няврэмӆан яха энмаӆтсаӊан.
Павел Иванович ашкуӆая рупитты ёхатмаӆан, Светлана хоӆна ашкуӆайн хутмет классан утаӆтыйс. Ӆапат таӆ ӆавӆас, хун имия туты эвеӆ энамаӆ. Йи номас понман, няӆъяӊ таӆ яха усӊан, няврэмӆан энмаӆтсаӊан. 2012-мет таӆан Павел Иванович антома йис. Муйкем сам хошийӆ, еӆӆы уӆты па мосаӆ. Няврэмӆаӆ атэӆ уӆӆат. Ӆув ёшаӆан энмам хиӆэӊаӆаӆ уна йисӊан. Ин па хиӆы няврэмӆаӆ ӆувеӆ амат тувман энамӆат.
Светлана Серафимовна оӆаӊ таӆат рупитмаӆан уншак эвет-похат пиӆан рупитас. Няврэмат ашкуӆая манты ӆэщатсаӆӆы, ӆуӊатты, ханшты утаӆтасӆы. Ин Альбина Михайловна Куртямова (Талигина) пиӆан пиӆаӊа рупитӆаӊан, кат-хуӆам таӆ ӆоват пошхиет пиӆан волкемаӆӊан. Веӆщи садика ёхаттыйн, няврэмиет хоӆӆаӆат, анти-ащи хоща ёхи вуратӆат. Тамиты, самаӊа тайман, ай няврэмат сора утӆапӆат па аматман хатӆ сыс шавиты хота хухаӆӆат.
Еӆпи паварт эӆты верам «Теремок» хота ӆоӊтыйн иса хошам, сыстам, эпӆаӊ ӆэтотан аваӆ, няврэм нях щащаӆ. Ветъяӊ таӆ сыс рупитман, Светлана Серафимовна нэмоӆты порайн пуӊӆа манты номасан ант ёхтыӆыса. Щикем щи рупатайӆ пеӆа самаӊ нэӊие. Садик хот па яӆпа верса, катра паварт хот юкана ин кев эӆты верам кат ятпи ун хорамаӊ хот, курт кутапан омасаӆ. Ӆыпи хот ятӆаӆ ӆащкамат, ишниӆаӆ унат.
Щутщаты порайн, кашӊ ӆуӊ Топоӆ вош пеӆа яӊхаӆ. Щита утаӆтыйм пиӆнэӊӆаӆ пиӆан яха уйтантыӆат, эвия уӆам порайӆаӆ эӆты потрэмиӆат. Утаӆтыйм щиран, хоӆыена ай наврэмат пиӆан рупитӆат. Щикем щи сам партам вер пеӆа эвиет утаӆтымеӆ па рупитӆат.
Зоя Куртямова ханшам потар
Авторы
Лух Авт
Темы