Лух Авт
Няврэмат атэӆ рупата пунштыя утаӆтасайт
Рупата пеӆа утаӆтыты няврэмат утаӆтасайт, хоты рахаӆ ӆув щирэӆан вер тайты рупата пуншты. Щимащ айкеӆ пиӆан «Ямальский многопрофильный колледж» няврэмат хоща Дарья Алексеевна Артёмова ёхтыӆыйс. Ӆув Пулңават Центр занятости хоща ведущий эксперта рупитаӆ.
«Овс мув шимӆаң мир ёх няврэмӆув ар пелак анта шеңк потраңат, еӆэмӆат. Утаӆтыты хотэӆан щикуш предпринимательской деятельность урокан маӆайт, туп рупата щирн атэӆ вер пуншты ант катӆащӆат. Хойтат нэпекӆаӆ ант хошӆат ӆэщатты, тухӆат департаментан омасты кущайт хоща инщасты манты паӆӆыӆат, хой па верты рупатайӆ еӆӆы туты вера ант эваӆаӆ. Щитаӆан, ванта, вер щиты сохнаӆ. Уңӆаң няврэм айшукие, хой инщасты порайн мосты щира ястаты хошаӆ па урайӆ нох пайтман верты питщам рупата нэпекӆаӆ патэӆ унты ӆэщатӆаӆӆы.
Тамхатӆ ма няврэмат пиӆан бизнес-ёнтопсайн щимащ рупата версув. Мет оӆңа рупата вер оша вусув па бизнес-план ханшсув. Щаӆта мосты нэпекат ӆэщатсув. Еӆӆы, нэпекӆув пиӆан хоӆта манты, муй потартты, номас понтсув. Няврэмат, рупата верэв нох пайтты ураңан, хой муй номас тайс па муй мосаӆ ӆэщатты, потартсат.
Атэӆ рупата вер пуншты порайн, маты рупитты хотатан вер ӆэрапты, па округеван муй хорпи нётапсайт уӆӆат, щит эӆты па потартсам», — Дарья Алексеевна ястас.
ГБПОУ ЯНАО «Ямальский многопрофильный колледж» па ГКУ ЦЗН ЯНАО кутӆаӆан яха рупитты нэпек ханшсатан. Щи нэпек хуват утаӆтыты няврэмата нётапса щиран там вантопса верман ус.
Зоя Куртямова ханшам потар
Авторы
Лух Авт
Темы