Лух Авт
Няврэмат хорат ханштыя утаӆтаӆ
Суматвошан Искусствайт ашкуӆа хот уӆ. Мата тахайн Светлана Прокопьевна Новьюхова 2020-мет таӆ вуш эӆты па ин тамхатӆ унты няврэмат сыр-сыр хорат ханшты верата утаӆтаӆ. Муй щирн ӆув щи ашкуӆаяӆн рупиттыя питас, муйсыр тахайн утаӆтыйс, щи вер эӆты там айкеӆэм хоща ма ханшӆам.
Мосаӆ ястатыя, хоты Светлана 1998-мет таӆн Тюмень вошан там нови турмев иӆпия ёхтас. Ӆув аңкеӆ-ащеӆ китамтак Суматвошан уӆты ашкуӆаятн похат па эвет утаӆтаман рупитсаңан. Ай эвеӆ, ванта, хатӆ сыс няврэмат ӆаваӆты хота тутлиӆысңан. Юхатшак Суматвошан кутап ашкуӆайн утаӆтытыя ӆув питас. Ищи таӆн ай эвие аңкеӆн-ащеӆн Искусствайт ашкуӆа хотэӆа ханшӆтаса. Щи вуш эӆты Света хорат ханшты щирата туса утаӆтытыя вуянтас. 2014-мет таӆн художественной тахайӆ Суматвош Искусствайт ашкуӆа хотан там эвие вурты диплом нэпекаӆ пиӆн етшаптас. Щаӆта кат таӆ сыс кутап ашкуӆайӆ хоща иса 11-мет классаӆ сохнаптаты вушаӆ унты па еӆӆы утаӆтыйс.
Щиты 2016-мет таӆн ӆув Психология па педагогика институтан искусствайт кафедра хоща Тюменской государственной университетан утаӆтытыя питщас.
Утаӆтыты верат манты порайн Светлана арсыр уйтантопсаятан па вантопсаятан ус. Институтан уӆты похат па эвет кутн «OkuKraft» нэмпи ай ёхӆаӆ кущая ӆув пирыса. Щи тумпийн «мода» щиратн куратор юкана ус па кашң пуш арсыр верат туңа щира па ямсыева ӆэщатас. Щи рупатайӆаӆ эӆты Светлана тамиты потартас: «Муң арсыр хорамаң ӆуматты сохат туса ёнтсув па студенческой хатӆат порайн оӆаң тахайт вуйӆысув. Юхатшак мувтэӆ мират «Этномода» нэмпи касапсайт манты таӆатн ищиты кашң пуш муң ай ёхӆув оӆаң тахая ёхтыӆысат».
Щиты утаӆтытаӆ кутн ешауӆ дипломной рупата нэпекаӆ ханшты пораяӆа щи ёхтас. Светлана научной руководитель нэңаӆ пиӆн ияха потрэмасңан па и номса ёхатсаңан, хоты ин ӆув ханты нэңат ӆуматты сохат ёнттыя верытаӆ па щи отӆаӆ онтасн диплом нэпек ямсыева еӆӆы ханшаӆ. Ванта, практикайӆ манты хатӆатан ӆув няврэмат пиӆн вошаң ашкуӆайн урокат ӆэщатас. Щитат вертаӆн похата-эвета ванӆтас, муйсыр ханшет арсыр мир ӆуматты сохат тайӆат. Щаӆта муй хорасап верат эӆты арсыр ханши щират сыр-сыр айкеӆат хоятата тутыя верытӆат. Щимащ вер ураңан Светлана ханты нэ ернас па нуй сах ёнттыя питас. Катра ӆув нэмоӆты порайн ант ёнтасас. Ин яма па вещката ӆувеӆа мосты ӆуматты сохат ёнттыя вуянтас. Мет оӆаңан вурты щашканат эӆты нэ ернаса ӆув самаңа катӆасас па щитаӆ айӆтыева ёнтас. Юхат ямкем хув нуй сахаӆ утща щирн туса па хорамаңа ӆэщатсаӆӆы. Ёнтасты пораятн яма ант уйтты вер Светлана аңкеӆ эӆты иньщассаӆӆы. Щаӆта аңкеӆ моӆты верат яма ант ки уйтас, ӆув Суматвош район шоши мират культура хота яңхас па щита рупитты нэңат эӆты ямсыева иньщасас. Еша уӆӆы ернасаӆ па нуй сахаӆ етшаптасӆы, диплом нэпекаӆ ӆуматтыя сохӆаӆ онтасн ӆув нох щи ханшсаӆӆы.
Щиты 2020-мет таӆн Светлана утаӆтыты нэпек ӆувеӆа хоӆамтас па ёхи ёхтас. Суматвоша ёхатмаӆн, ӆув номас верас, хоты Искусствайт ашкуӆа хотн еӆӆы няврэмат хорат ханштыя утаӆтаты питӆ. «Щи манмемн, мет оӆаңан щиты нумассам, хоты еша рупитӆам па па тахая айн-айн манӆам. Юхат кашң ай муй ун вер няврэмат пиӆн рупитты щирн манэма умща йис, щи вер ураңан манэма па рупата еӆӆы уӆапса щирэмн иса ант па мосӆ», — щиты щи Светлана Прокопьевна потартас.
Ёхи хащам пораятн няврэмат хорат ханштыя утаӆтаты нэңев ястас, хоты ай похат па эвет пиӆн ӆув арсыр мультфильмат хоща уӆты вой хорасат туса нох ханшӆат. Щаӆта щита яма оляпан нэрӆат па ӆыеӆ утаӆтаты нэңеӆа ванӆтаӆат, муй хорасап хорамаң войт ӆэщаттыя верытӆат. Кашң айшак, уншак верат ӆув утаӆтаты няврэмӆаӆ хоща Светлана шеңк самаңа тайӆ па мосты порайн ар щирн нётӆ. Мосаң, щи ураңан ӆув хощаеӆа утаӆтаты похат па эвет арсыр вантопсайт ӆэщатты хатӆатн куш ашкуӆайн, куш вошан ӆый туса, хорамаңа ханшам хорӆаӆ ванӆтаӆат па тухаӆ няврэмат ищипа оӆаң тахаята щи питӆат.
Щимащ хорат ханшты няврэмат утаӆтаты ханты нэ Суматвошн уӆ па рупитаӆ.
Владимир Енов ханшам потар
Авторы
Лух Авт
Темы