Лух Авт
Няврэмат утаӆтаты хоятат утаӆтысат
Кимет таӆ шоши мувев ашкуӆаятан рут ясңа няврэмат утаӆтаты хоятат Тюмень вошан уйтантысат. Округ эӆты няӆхощъяң хоят яңхас. Таӆаң ӆапат лекцияйт хуӆантсат па ханшсат, хоты яӆап щира няврэмат утаӆтаты мосаӆ. Тюменской университетан рупитты хоятат лекцияйт ӆуңатсат.
Яңхам хоятат эӆты хуӆам ханты хоят ус. Ӆув кутэӆан Ольга Николаевна Пандо, Охсар куртаң няврэмат ханты ясңа утаӆтаӆ. Хоты уйтантопсаеӆ манас, потар тус.
«Утаӆтымев порайн ар яӆап щир эӆты ош версув. Компьютеран рупитты яӆап щират утаӆтысув, хоты ёхи маты рупата эвета-похата кена верты, урок порайн няврэмата утаӆтыты хоят хуӆантты иса ощхуль ат ус.
Кимет хатӆ этностойбище «Увас мир хот» хоща экскурсияя тутӆысаюв, вуӆы хот ӆыпийн рупитсув. Щита муңева ханты уӆапса эӆты потар туса, алям ёнтопсаятан еша ёнтсув, мастер-классан масаюв. Вантам верат иса ашкуӆайн уӆты няврэмӆува маты питӆув. Щутщаты юкана, хоты Тюмень вош катра пора эӆты хорамаңа йис, вантты тутӆысаюв.
Там утаӆтыты тахаев шеңк ощхуль па ошаң ус. Муңев утаӆтыты китам «Региональной институт развития образования» хоятата ун пумащипа ясаң китӆам па ястаты вутщиӆам, тамащ утаӆтыты харат верты мосаӆ. Утаӆтаты хоятат яӆап верат оша пайтӆат па ӆув кутэӆан па утаӆтыӆат. Папуш тамащ уйтантопсайт вертыйн, аршак хоят ат ёхатаӆ», — Ольга Николаевна ястас.
Зоя Куртямова ханшам потар
Авторы
Лух Авт
Темы