Лух Авт
Няврэмиет емаӊ хатӆ постасат
Хон мувев шимӆаӊ мир хоятат емаӊ хатӆ постатыйн, Ӆапатнаӊк вошаӊ ай няврэмиет ищи тохи пиӆтащсат. «Эдейко» нэмпи ай няврэмат хатӆ сыс яӊхты хотан уйтантопса манас. Щи хатаӆан аӊкет-ащет, ун ащет, ун аӊкет няврэмӆаӆан-хиӆыӆаӆан ӆэщатам каш вантты вохсайт.
Щаӆта щи, нарасъюх сыйт щащты питсат. Мойӊ хоятат омасӆат, вантӆат. «Ӆонщ сэмие» группая яӊхты тюпаӊ пошхиет, шоврыет иты каш альты норма ким ӆарэмасат. Рущ па ханты ясаӊан ар арысат. Ӆуӊтарат ӆуӊатсат. Нови ернасатан ӆонщ сэмиет иты ӆарысат. Щаӆта па йи аӊки хут эви пиӆан ханты як яксат. Юхат щи эвиет, ӆумтам ернасӆаӆ альман, хорамаӊа карыман, каш верты норам хуват шушиӆысат.
Лариса Васильевна Муслимова (Куртямова) хатӆ сыс шавиты няврэмӆаӆа па каш вантты ёхтам мойӊ хоятата ханты уӆапса эӆты потар тус. Муй хорпи хорамаӊ па хошам ӆумтам сох хантэт тайӆат? Муй щиран ернас ёнтӆа, хоты ӆув хораматӆа? Муй хорпи ханшет уӆӆыӆат, муй нэман понман уӆӆат па маты ханши хоӆта ёнтты рахаӆ? Щит эӆты потраӆ манас.
Потар хуӆантты сыс няврэмиет еша щутщасат. Юхат ёхтам рут хоятӆаӆ пиӆан эвиет-похиет верантты хот ята вохсайт. Эвет ернас ӆумтыӆыйм тумпийн, Лариса Васильевна хоӆна аканя ёнтам ай ернасыет ёхтам мохиӆаӆа аляс. Кашӊ няврэм ӆув ёшаӆан ернас катаӆсаӆӆы, кератман яма вантсаӆӆы. Щаӆта нэпек эӆты эвтам хорат оляпан нёсытты омассат. Хоя маты оляп сама хойс, щимащ оляп пирысат. Верам рупатайӆаӆ аӊкиӆаӆа-ащиӆаӆа этаӆтасӆаӆ па ванттыя нох тахартсайт.
Там йисан Овс мувеван тэӆыя ёхтам хоят. Таӆаӊ хоттэӆатан муӊ мув сыӆӆув пеӆа касаӆӆат. Муй рут мир хоятат тата уӆӆат, щит эӆты нэмоӆты ант уйтӆат. Тухӆат, унаӆ-аяӆ рущ ясаӊан потартты ант хошӆат. Ванты, муӊ мувева уӆты ёхатсаты, муӊ уӆапсаев ищи шавиман таяӆан. Щит ураӊан, ай няврэмӆаӆ пиӆан, ун хоятӆаӆ ищи ат уйтӆат, оша пайтӆат па еӆӆы нумман ат тайӆэӆ муй хорпи рут мир хоятат тата уӆӆат.
Зоя Куртямова ханшам потар
Авторы
Лух Авт
Темы