Лух Авт
Нох питам хоятат постасайт
Щимӆаӊ мир ёх емаӊ хатаӆан Пулӊават вошан «Муӊ рут ясаӊан потарӆув» нёхты хор конкурсан касты хоятат ястасайт па мойӆаптасайт. Там таӆан 83 нёхты хор китман ус. Ӆув кутэӆан: 33 — ур ясаӊан, 27 — ханты, 8 — ёрн ёх, 11 — саран па 4 — русь ясаӊан.
Сот ветъяӊ округ хоят няӆъяӊ пеӆа йи вош па курт эӆты, кат хоят Ёмвош па Саран мув эӆты нёхты хор китсат. Кат таӆ ӆоват эӆты нийӆъяӊ пеӆа ветмет таӆ унты хоятат кассат.
Там таӆан нох питам ёх па призёрат конкурсной комиссияйн пирысайт. Департамент ёх, нёхты хор ӆэсятты па этаӆтаты тахайн рупитты хоятат, шоши мир ёх пиӆан рупитты организацияйт тохи ӆоӊаӆман усат.
Ханты хоятат кутан Галина Григорьевна Лобанова, Касам-Нёӆ эӆты па Эльвира Прокопьевна Серасхова, Питӆор эӆты оӆаӊ тахая этсаӊан.
Алла Прокопьевна Тайшина Охсар курт эӆты па Степан Игоревич Талигин Овкурт эӆты кимет места вусӊан.
Анастасия Петровна Конева Мужи вош, Ольга Владимировна Акушка Ноябрьск па Александр Николаевич Куртямов Ямкурт эӆты хуӆмет тахая этсат.
Галина Григорьевна Лобанова ясаӊ верас: «Муӊ си конкурса кимет пуш нёхты хор китӆув. Хасям таӆан кимет места усув. Няврэмӆам щащеӆ пиӆан па ма нёхты хор ӆэсятсув. Ирина эвем — нёхты хор верас, похӊаӆам — Павел па Михаил хуӆ мосятсатан па эватсатан. Щащеӆ Вера Никитична Лобанова сорт хуӆ сох татӆас. Ма па си сох эӆты хыр ёнтсам.
Там таӆан оӆаӊ тахая этсув. Куртаӊ няврэмат па эвем пиӆан нёхты хор ӆэсятсув, хоты тахар сэвӆа. Муй хорпи торан, хоты сораӆты, хоты сэвты па муй порайн сэвты, няврэмата мастер-классан альсам. Сит нёхты хора ӆэсятсув па китсув».
Хасям сютсяты хатаӆан нох питам хоятат Пулӊават воша ёхтыӆысат. Кашӊ няврэм, ун хоят, хой нёхты хоран этаӆтыйс, хоӆ дипломан па мойӆапсайн масайт. Си уйтантопсайн Галина Григорьевна ёхтыӆыйм хоятата аляс, хоты сорт хуӆ ӆов эӆты хорамат ӆэсятӆайт.
Альбина Тырлина ханшам потар
Авторы
Лух Авт
Темы