Лух Авт
Ӆохан хатэмиты касапса манас
Курк тыӆась нийӆмет хатаӆан хон мувев хуват, Воӆаӊ Ляль 80-мет постам таӆа, «Лыжня России» касапса манас. Кашӊ вошан ӆохан ӆойты хошты па туса хатэмиты няврэмат па ун хоятат яха уйтантысат.
Си хатаӆан Ёмвош округан А.В. Филипенко нэм тайты таӆ касапсайт Центран кат сёрс моӆтас хоят касты этас. Югра мув куся ху Руслан Кухарук, Светлана Слепцова па Евгений Дементьев олимпийской чемпионӊан мойӆапса ясаӊ ястасат.
«Там таӆ мет воӆаӊ. Там пуш хон мувев 80-мет Воӆаӊ Ляль етшам таӆаӆ постаты питаӆ. Касапсаев Ун Лялян уӆам хоятӆува постасэв.
Уӆты мувеван хон мув па па мув ӆохан хатэмиты па пошкан эӆты оратты касапсайт манӆат. Шеӊк ям ӆэсятыты харат тайӆув. Ар хон мув па па мир олимпийской чемпионатат верӆайт.
Хоӆна там пуш округев 95-мет таӆа йиӆ. Ёмвош мувев антом туп касты хоятатан, шоши мир хоятӆуван тащаӊ. Ӆув онтасэӆан кашӊ емаӊ хатӆат, симась касапсайт манӆат», — округ куся ху ястас.
Си касапсая рупитты хоятат, няврэмат, таӆаӊ хоттэӆат ёхтыӆысат. Оӆӊа кашӊ ёхтыӆыйм ай-ун хоят ӆув категория хуват ӆохан хухатӆыйс. Си юпийн шоши мир хоятат ветсот метра вой веӆпасӆаты ӆохан этнозабег версат.
Касапсайт кутан мойӊ хоятат вуӆы па амп ухаӆан хатэмисат, тынщан ёваӆмисат, ухаӆ шоппи навармисат, вуӆы хотан хошъйиӊк па шай йинсьсат, пормасат ӆутсат па лотерея хося кассат.
Хон мувеван си касапса 1982-мет таӆ эӆты верӆа. Ёмвош округан 43-мет пуш манас, касты па аӆ хоятат актас. Муӊ округеван атом турам уӆмаӆ ураӊан, касапса ант верыӆыса. Ай кер тыӆась унты ӆохан хатэмиты уйтантопсайт манӆат, хоятат касты харатан уйтантыӆат.
Авторы
Лух Авт
Темы