Лух Авт
Ӆохан яма хататлиты эви
Туняӆ Ӆорвош районэм эӆты Ёмвоша утаӆтыты щира ёхтам эви Алёна Аляба пиӆн уйтантсам. Ӆув Югорской государственной университет «Физическая культура» факультетн 4-мет курсан утаӆтыйӆ. Ма ӆув пиӆэӆн потарсам.
Алёна ястас, ӆув 2002-мет таӆн Ас хаӆты тыӆащ 10-мет хатаӆан Ӆорвош район Мужи куртан Владимир Степанович па Татьяна Владимировна Аляба хотн сэма питас. Аньтеӆ ханты Озелов рут эӆты йиӆ. Ащеӆ хуӆ веӆпасӆас, аньтеӆ хатӆ сыс ай няврэмат тайты хотн ай воспитателя рупитӆ. Ӆув семьяеӆн хуӆам няврэм сэма питсат: Алёна — мет ун эви, щаӆта Вадим па Полина. Вадим Пулӊават медколледж етшаптас, Пулӊават вошн реабилитационной тахайн рупитас, ин па соӆтана манас. Полина апщеӆ хутмет классан утаӆтыйӆ. Ащеӆ антома йис, щишн няврэмат айтэӆн аньтеӆа нётсат.
Алёна Аляба рутэӆ эӆты айкеӆ тус:
– Аляба рутэм Ӆорвош район Ёханкурт эӆты йиӆ. Щи курт Войкар Кев ёхан хонаӊан омасӆ. Опращем вуӆы тащ ӆавӆас. Щаӆта щутщаты манмаӆн щащем пиӆн куртан хуӆ веӆпасӆаман ус. Ӆын ар няврэм тайсаӊан. Муӊ кашӊ щутщаты порайн ӆын пиӆаӆн Кев хоща па ёхӆы касаӆсув, нётсув, щишн вуӆэт ӆаваӆты вер яма тайӆэв. Ин муӊ яев вуӆы тащ пиӆн касӆаӆ. Манэма айтэӆн ӆуӊ порайн Кев шоппи касаӆты шеӊк умащ ус, ванты, щи порайн Кевев шеӊк хорамаӊ!
Аляба рутэм эӆты потартты ки, муӊ тус верантты ёх тайӆув, и уйтаӊ хоят — щит Сергей Валерьевич Аляба. Ӆоват эӆты арсыр хорамаӊ пормасат верты ху. Муӊ Аляба рутэв хоща хуӆ веӆпасӆаты, вуӆы тащ ӆаваӆты, верантты па па хоятат уӆӆат.
Алёна Ващъёханов куртаӊ ашкуӆайн утаӆтыяс. Щита рут ханты ясӊа Надежда Степановна Аляба ӆувеӆ утаӆтас. Ашкуӆайн ӆув литература урок самаӊа тайсаӆӆы, хорамаӊ потрат ханшас. Щиты ястас:
– Рущ ясӊа па литературая утаӆтаты нэӊемн ма ван кутн ишаксайм, матты ки, ма потрат туса ханшӆам па ӆуӆн еӆӆы щи вера ат утаӆтысам. Еӆпи экономиста утаӆтыты номас тайсам. Ма ныем Елена Владимировна Сибарева (Озелова) — Ямал мувн уйтаӊ тележурналист нэ, ӆув шеӊк ӆаӊхас, ӆуӆн ма ищи айкеӆат акатты нэӊа ат утаӆтысам. Туп ма юраӊа-щёмаӊа йиты утаӆтаты нэӊа утаӆтыӆам. Нэпекем щирн, ма няврэмат касты туризма утаӆтаты питӆам. Ма, ванты, ашкуӆайн ищи касты туризм вер мосты тайсам, ван кутн Кева яӊхиӆысув. Ин там пора унты касӆам. Щи тумпийн ван кутн ӆохан хататлиӆам.
Алёна ханты семьяйн энмас, вуӆы тащ пиӆн касӆас, щишн ханты мир уӆапса яма уйтаӆ. Потартаӆ:
– Ханты семьяйн энампсам, щишн уйтӆам, муй рахӆ, муй анта. Тамхатӆ ӆухасӆама муӊ уӆапсаев эӆты хорӆам муй па ай кинайт альӆам, ӆывеӆа шеӊк умащ, муй щирн муӊ нюки хотн уӆӆув, муй щирн вуӆы тащ пиӆн касаӆӆув, муй хорпи хорамаӊ аня лыптаӊ Кев мувем ӆуӊ порайн.
Ма айтэӆн щащема нётсам — хот рупатайт версам, кепӆат татаӆсам, ёнтсам, сак эӆты арсыр сак кеӆат версам, ин кум ант тайӆам, туп щи верат нумӆаӆам — туп оӆӊитӆам ки, ёшӊаӆам имохты верты питӆаӊан. Ёмвошн ма ван кутн арсыр верантты харата яӊхиӆыӆам. Туняӆ сусн «Торум Маа» музейн утаӆтыты харн усам па Галина Токчевна Шиянова пиӆн вуӆы сох татаӆсам, щаӆта ванщсам па тутщаӊ хир ёнтсам. Ма аньтем па ӆув опиӆаӆ ищи хоӆыена ими верат верты хошӆат, ванщасӆат, ёнтӆат, сэвӆат, сак каратман арсыр хорамаӊ сак кеӆат па па отат верӆат.
Ёмвошев па утаӆтыты тахаеӆ эӆты Алёна щиты ястаӆ:
– Ёмвоша утаӆтыты ёхатмемн ма имохты оша пайтсэм, муйсыр хорамаӊ па там йис щирн верам вош, муйкем ун Югорской государственной университет. Манэма тата шеӊк умащ утаӆтыты. Ма яӆап пиӆнэӊӆам пиӆн уйтантсам. Еӆӆы магистратура хоща утаӆтыты номас тайӆам.
Щимащ ям ханты эви пиӆн уйтантсам. Ӆувеӆа ям ясӊат китӆам: еӆӆы яма па туса ат утаӆтыйӆ, муйсыр ям номпсат тайӆ — ӆув уӆапсаяӆн ат тыйӆат! Таӆаӊ ёш, таӆаӊ кур наӊена, Алёна!
Людмила Шульгина ханшам потар
Авторы
Лух Авт
Темы