Лух Авт
Охсар вошна каӆаӊ ёх емаӊ хатӆ постаса
Тампуш щи емаӊ хатӆ 30 моӆтас таӆ пуш постаӆа. Там таӆн мет хорамаӊа па ольпаӊа хув ӆавӆам хатӆа ӆэщатыса. Нэман щи урӊа Ямал мувев куща Дмитрий Артюхов па Кев сыӆ район куща нэ Марина Трескова ёхтыӆысат.
Мет оӆаӊна, щи еӆпи, ай кер тыӆащ 27 хатаӆна энамты ёх кеша каш па касапса ищи верыӆыса. Няврэмат, хой Охсар вош ашкуӆа-интернатна уӆӆат, этаӆтысат хоты ӆув хошӆат тынщаӊ ёваӆты, ухаӆ шоппи наварты, юх катна таӆты па няр хуӆ ӆэщатты. Эвет па этаӆтысат хорамаӊ сохӆаӆ. Нэман щи урӊа ӆув хощаеӆ антиӆаӆ-ащиӆаӆ па рутӆаӆ ёхтыӆысат.
Щаӆта щи хатаӆна, етна пелка, ун собраний верса, хота потарса каӆаӊ ёх верӆаӆ эӆты. Каӆаӊ ёх потарсат хоты факторияят рупитӆат па ястасат муй мосаӆ щи вер щиран ямашак ӆэщатты. Аратӆ, Ун Кев сыӆ район ӆоватна 820 моӆтас хоттэӆ ёх каӆаӊӆаӆ пиӆна касаӆӆат. Щит 2600 моӆтас хоят. Арпелак хоят емаӊ хатӆа ёхатсат па щи сахат мосты верӆаӆ туӊа-щира ӆэщатсаӆӆаӆ.
Щи юпина, яма па ар рупитам хоятат ураӊна ишканщап нэпекат ёша масаят па мойӆапсаят мойӆасаят. Щиты 40-кем хоят хойӆыса. Щи кутна хантэт ищи: Благодарность Губернатора ЯНАО — Ольга Тайшина па Благодарность Департамента АПК ЯНАО — Павлина Климова. Катӊан совхоз «Байдарацкий» хоща каӆаӊ хотатна рупитӆаӊан.
Ай кер тыӆащ 28 хатаӆан, аӆаӊ эӆты, Охсар вош каӆнаӊна хоятат актащсат. Мет оӆӊа касты ёх ёхатсат. Ӆув утӆам шоши касапсаевна кассат па юращсат. Касты хоятат шеӊк харщет, туп еша йиӊк ӆаварт верас. Роман мелка ювам ураӊна Ас каӆнаӊна тэӆыя йиӊк этмаӆ. Ищипа юраӊ касты ёх ӆувиӆаӆ яма этаӆтысӆаӆ. Мет тынаӊ мойӆапса каӆаӊ ухаӆна ӆэӆамтыман Алексей Тайбери шитас. Ӆув яӆап ӆонщхопна ёхи манас.
Касапса тумпина хоӆна ар вантапса па каш верты лотат вусат. Хой няр нёха ӆэты ӆаӊхас, верытас вантты хоты щи ӆэтот туса нёхарӆа. Щи юпина мояӊ хоятат эпӆаӊ ӆэтот ӆэсат. Щиты, нэӊат кутан нёха ямашак ӆэщатмаӆ Вера Тоголя, ёх кутан па — Павел Вэненго.
Тынасты хар ищи шеӊк ар уӆмаӆ: ӆэтотат эӆты па ӆуматты сохат унты. Мосты пормасат 70 моӆтас ӆапкаят эӆты арсыр муват эӆты ёхтыӆысат: Тобольск, Ижевск, Пермь, Воркута, Каменск-Уральский, Сургут, Ёмвош па Волгоградский область эӆты.
Муй щиран па, каӆаӊ ёх емаӊ хатӆ порыӆы хащаӆ? Таӆаӊ 3 яӆап хоттэӆ этас. Хантэт, урт па удмуртат поры версат. Хантэт эӆты Роман Тайшин нэ тус. Сишна нумасӆув, каӆаӊ ёх вер хоӆна еӆӆы уӆты питаӆ.
Иван Сандрин ханшам потар
Авторы
Лух Авт
Темы