Лух Авт
Округ щуняӊ емаӊ хатӆат
Округ шоши ёхат-нэӊат уӆты-хоӆты щират ӆаваӆты па еӆӆы туты таха куща нэ Ольга Владимировна Гизатуллина (Огаркова) пиӆан уйтантысам па ӆув эӆтайӆ емаӊ хатӆат манты щират иньщассам.
– Ольга Владимировна, матты айкеӆ наӊ эӆтаен муӊева потартӆан?
– Ма там Пулӊават вошан 1991-мет таӆ вуш эӆты уӆты питсам. Мет оӆаӊан педколледжан утаӆтысам. Щи юпийн Тапаӆвош хоща Д.И. Менделеев нэмпи пединститут етшаптасам. Ма няврэмат утаӆтаты нэ щира ӆэщатысам. Щитэм щирн, хота кепа ант усам, иса культура верат пеӆа самеман таӆсайм. Щиӊанща Округ шоши ёхат-нэӊат уӆты-хоӆты щират ӆаваӆты па еӆӆы туты таха хота ёхатсам. Мет оӆаӊан ант па нумассам, хоты ханты муй па ёрн мирӊан кутан манэма еӆӆы шеӊк самаӊа тайты вер мощатӆам. Щи йис порайн аӆ умащ ус хоятат еӆпийн туса арыты па потрэматы, ар ёхатан-нэӊатан ямсыева тайсайм. Туп юхат оша пайтсэм, хоты ма мет араӊ-монщаӊ хоятат кутан рупитӆам.
– Наӊ ин Округ шоши ёхат-нэӊат уӆты-хоӆты щират ӆаваӆты па еӆӆы туты таха хотан рупитӆан па муйсыр верат нын щита кашаӊ пуш яма ӆэщатӆаты?
– Иса 1990-мет таӆ вуш эӆты па 2000-мет таӆат унты там тахайн Инна Васильевна Сотруева ус па рупитас. Ёхи хащам порайн ӆув Ямал мув шоши мират департамент куща нэӊа рупитты питас. Ма Наталья Худи (Башева) па Сергей Худи пиӆан рупитсам. Тамхатӆ муӊ Округ шоши ёхат-нэӊат уӆты-хоӆты щират ӆаваӆты па еӆӆы туты таха хотан уӆӆув па иса арсыр верат ӆэщатӆув. Щиты хантэт, ёрнат, селькупат па саран ёхӆув культурайт ин артаӆаман па яӆпатман кашӊ хатӆ сыс муӊ тата вещката па туса рупитӆув.
Аратэӆан 25 хатнэху там тахаев хоща сыр-сыр рупатайт вераӆ. Муӊ хощаева фольклор туса вантты, ямсыева арпелак эӆты ӆувеӆ оша верты ёхат па нэӊат щимащ верат ураӊан ищи тайӆув. Ӆый, ванта, монщат, йис потрат муй арат, якты па нарасӆаты щират иса ошаӊа-щащаӊа тамхатӆ ӆэщатӆат.
– Ольга Владимировна, мата тахайт эӆты там Пулӊават воша Мувтэӆ мир емаӊ хатӆат порыӆыты хоятат арпелак ёхтыӆыӆат?
– Ма щиты ястаӆам, хоты там емаӊ хатӆат порыӆыты хантэт, ёрнат, селькупат муй па саранат Приуральской, Ӆорвош, Ямальской, Пуровской, Надымской, Красноселькупской районат па Пулӊават, Надым, Ӆапатнаӊк вошат эӆты хоятат хоӆыева ияха ёхтыӆыӆат.
Туп Новой Уренгой, Ноябрьск, Губкинской па Муравленко вошат эӆты уӆты ёх тый ант па ёхтыӆыӆат. Щи тахаятан, ванта, шоши мират культура па ясӊат яма ант тайӆайт па шеӊк шимаӆ ханты муй ёрн щата уӆ. Ма нумастэман, емаӊ хатӆат еӆӆы мет яма, тащаӊа па хорамаӊа ӆэщатты питӆаӆӆув!
Владимир Енов ханшам потар
Авторы
Лух Авт
Темы