Лух Авт
Округев яӆап автобусатан тэкаптаӆа
Там пуш округева ӆапатъяӊ пеӆа кат автобус ӆутты ястаса. Ярхус машина, моторӆаӆ бензин юкана мув шув тут йиӊкан понман, рупитӆат. Хутъяӊ пеӆа кат машина «Безопасные качественные дороги» па «Развитие общественного транспорта» нацпроектат хуват тынаӆ еша иӆшак пайтам щиран ӆутсайт.
Хольмаӊ машина округева ёхтаптаса. Катхощъяӊ — Ноябрьск воша туса, яртъяӊ кашӊ воша — Новый Уренгой па Ӆапатнаӊк, Пуровской района йи автобус. Аяӆта катра машинайт нох вуӆайт, щи юкана яӆап машинайт эсаӆӆайт.
Ӆапатнаӊк вошан БАМ па Обской, еӆан уӆты микрорайонат пеӆа веӆщи тувам автобусат юша этсат рупитты. Пуровской районан, Халясавэй — Вынгапуровский ай куртат кутан яӊхты питӆат.
Яӆап автобусат арсыр мосты пормасатан ӆэщатман уӆӆат. Муй арат хоят ӆыпия ӆоӊаӆ ӆуӊатты пормас, юш нэпек ӆутты па машина ӆыпеӆан нёхты хор ханшты хошапат тайӆат. Маршрут хуват мантыйн, ГЛОНАСС хуват ныӆайт, маты машина хота манаӆ.
Автобусан рупитты хоятаӆ муй арат щёс рупитаӆ, метас, мосаӊ оӆты ӆаӊхаӆа, щутщаты порая йис муй анта, иса вантман тайӆа. Няврэм оӆты па мушаӊ хоятат тутӆыты коляскайт ӆыпия ӆоӊаӆты па ким этты ураӊан овӆаӆ утӊа, хотхарӆаӆ па иӆаншак верман уӆӆат. Ӆыпия ӆоӊты ов харӆаӆ ӆащкама ӆэщатсайт, ар хоят ӆоӊты порайн ермат ант ат ус.
Хащам вет таӆ сыс вошаӊ хоятат тутӆыты машинайт 92 процента яӆаптасайт. Мув шув тут йиӊк понты станцияйт Ноябрьск, Муравленко па Ӆапатнаӊк вошатан пуншсайт. Щимащ тут йиӊкан яӊхман, вошатан ӆаӆты ӆыӆ шув еша сыстамшак питаӆ па «Экология» нацпроект хуват рупата еӆ хатмаӆ.
Зоя Куртямова ханшам потар
Авторы
Лух Авт
Темы