Лух Авт
Округеван ай хопаӊ касапсайт ӆэсятты утсийӆ
Алексей Максимович Русмиленко там форума оӆаӊ пуш ёхтыӆыйс. Пулӊават вошан рупитаӆ. Ӆупан ӆоваӆты касапса федерацияйн вице-президента уӆ.
Каматса ясаӊ рупатайӆ, ӆоваӆты касапса федерация па «Российский Север» форум эӆты потар тус: «Ӆорвош район Горка вошан сэма питсам па энапсам. Киров вошан охотоведение специальность сирн утаӆтысам. Горка вош совхозан каматса таӆ бригадира усам. Сяӆта Пулӊават воша мантсам. Войт, хуӆат, заказникат шавиты щиран «Дирекция особо охраняемых природных территорий» тахайн рупитӆам. Ин си таха кат организацияя верса: хуӆ-вой веӆпасӆаты тахайт па заказникат. Ма заказникат хуват рупитӆам.
Рупатаем тумпийн ма хоӆна ӆоваӆты касапса федерацияйн вице-президента ӆуӊтасӆам. Байдарка па каноя касапсайн йи хоят йи ӆупан ӆоваӆаӆ. Гребной касапсайн — йи хоят кат ӆупан ӆоваӆаӆ. 2021-мет таӆан си касапса Пулӊават вошан пуншман ус. Хуӆам таӆ сыс ун рупата версув.
Роман Рашитович Кузнецов кусяя ӆуӊтасаӆ. Хасям таӆан грант ох шитас. Си охатан хуӆам хоп, хота ихосьяӊ хоят омасты верытаӆ, ӆутсув. Ӆуӊан касапсайт версув. Сёрфинг хорпи сохӆат тайӆув. «Ашкуӆайн утаӆтыты няврэмат кеша касапсайт» проект ӆэсятсув. Оӆаӊан хутмет ашкуӆайн утаӆтыты няврэмат пиӆан рупитсув. Тата кассат. Москва вошан манам касапсая финала этсат. Ма хуӆам няврэм тутӆысам. Йи пох хольмаӊ няврэм кутан няӆмет тахая этас. Кат похӊан яӊмет па ветхосьяӊмет местая этсаӊан.
Номас тайӆув, Пулӊават вош ашкуӆаятан симась касапсайт верты. Ӆуӊан па таӆан секцияйт туӆув. Таӆан няврэмат си касапса ант ёрэматы ураӊан, тренажёрат тайӆув, сита ӆэсятыӆат. Хасям таӆан ӆоваӆты клуб пуншсув. Няврэмат, ун хоятат, хой ӆытӆайт, тохи яӊхты верытӆат. Касапсайт тумпийн, муӊ сютсиӆув, мячикан ёнтӆув, унта яӊхӆув, нёхи шарытӆув, шай йинсьӆув, потрэмиӆув.
«Российский Север» касапсая ма Илья Игоревич Русмиленко пиӆан грант нэпек китыӆысман. Ар пелак ӆув ӆэсятыйс. Ӆув форума ант питас, сишан грантэв па ант пирыса. Ӆув Горка вошан ай хопан касты веран представителя уӆ. Ма нумасӆам, муӊ проектэв хоӆна нох питаӆ. Хасям таӆан, хун округ кусяев Дмитрий Артюхов Горка воша ёхтыӆыйс, Илья Игоревич си вер эӆты инсясапса верас. Симась касапсайт ай куртатан верты мосӆат. Кусяев ястас: «Си вер еӆӆы туты мосаӆ». Ин Горка вош няврэмат си касапсайн касты питӆат. Хут тренажёран туӆайт. Кашӊ куртан симась касапса еӆӆы туты утситы хоятат ки питӆат, сит шеӊк ям питаӆ. Си тренажёратан касапсайт онлайн сирн манӆат. Интернет хуват экрана этӆат. Кашӊ регионан касапсайт ипуляӊ манӆат. Минутайт, секундайт иса ныӆайт.
Си вер тумпийн, муӊ шоши мир ёх ай хопан ӆоваӆты касапсайт ӆэсятты утсиӆув. Ай хопат па обласат верты ураӊан, грант ох шитты нэпек мийӆысув. Ёмвош округ иты манты касапсайт верты. Ма нумасӆам, иса тыйӆ, туп пора па хоятат нётапса мосмитаӆ. Муӊ симась касапсайт ханты хоятӆув кутан верты утсиӆув. Ӆуӊан, хун ханты хоятӆув ун емаӊ хатӆатан хоӆ яха уйтантыӆат, верты. Кашӊ мир хоятат симась хопат тайӆат, касапсайт верӆат. Муӊ па ант верытӆув? Си ханты вер иса ант ушты ураӊан, еӆӆы туты мосаӆ».
Альбина Тырлина ханшам потар
Авторы
Лух Авт
Темы