обновлено: 09:24, 18 июля 2023
Лух Авт
Омащ ӆуңатты нэпек мосман тайӆа
«Муй сит симась ям па муй сит симась атом», щимащ ясңат эваӆт пинщаӆ ханты ясаңна ӆэщатам йиӆап ӆуңатты нэпек «Мет омащ ӆуңтарат па маньщат мет ай нявремат ораңна». Геннадий Кельчин ӆэщатам нэпек, ӆув Хон мув нэпек ханстытты, Ямал мув Заслуженный работник культуры па мастер фольклорного жанра.
Щи ӆуңатты нэпек там ванан АНО «Ямал-Медиа» типография хоща этас. Там итта холмет сборник, щи Павел Бажов хансам «Щелох Тупайи» («Серебряное Копытце»), «Тутпар-Якпар эвие» (Огневушка-Поскакушка) маньщат. Ит па Владимир Маяковский хансам ӆуңтар «Муй сит симась ям па муй сит симась атом» («Что такое хорошо и что такое плохо»).
Геннадий Кельчин лавты ясаңна:
– Хансты ораңна маньщат пирымем порайна, ма мет такан вантсам мурна ат ощӆайт. Бажов маньщат па Маяковский ӆуңтарат мур тэӆ нэңхуна хасӆайт, ай тэӆна ӆуңатӆайт. Хон мув тэӆ нявремат щи маньщатна самаңңи олда онттысат, атам ант верта.
Ханты ясаң пеӆа ӆэщатты ораңна таӆ молтас манас. Ма рущ ясаңна хансам щирӆ хыйта ӆытсам, контат ӆуңатта ат веритӆа.
Ханты нявремат ясңеӆ онттада веритӆат щимащ маньщат ӆуңатман».
Нэпек хоща понам хорӆаӆ Татьяна Кайзер хансам атат. Щи томпына, щита нявремат ораңна аляптаты хорат понтсайт «Маньщат яха аляптаӆӆу». Нявремат веритӆат щита олды хорат ӆув ӆыттэӆ щирна аляптата.
Щи ӆуңатты нэпек Международной десятилетие языков коренных народов 2022-2023-мет таӆата па региональной проект Народы Арктики манты таӆна этас.
Вера Лонгортова хансам потар
