Лух Авт
Ӆорвош мув ӆыӆаң сирӆув
Ӆорвош районан Ханты-Мужи куртан Ёмвош округ па Ӆорвош район Мужи, Ӆорвош па Овкурт куртат эӆты туса вератты хоятат яха уйтантысат. Си тумпийн сита хоӆна Ёмвош, Ӆапатнаңк, Пулңават вошат па Ӆорвош район хольмаң пеӆа няӆ няврэм этнографической экспедицияя ёхтыӆысат.
Туса вератты хоятат ияха ханты, охаль па саран уӆапса этаӆтысат. Хой ханты нэ па ёх ернасат, хашапат ёнтас, хой кур верас, хой па тонты эӆты пормасат ӆэсятас.
Хуӆам хатӆ сыс Ёмвош округ «Торум-Маа» музейн рупитты нэ Надежда Александровна Коновалова па Ӆорвош нэ Наталья Афанасьевна Малькова нянь кур версаңан. Няврэмат па ун хоятата нётман па утаӆтыман, сикем умась кур версат, нохар юхат (кедрикат) шитсат.
Яң хатӆ сыс ёхтыӆыйм няврэмат па ун хоятат ун хоттэӆа йисат. Яха утаӆтысат, вератсат, сютсисат па пора хайсат. Ям номасан ёхи мантсат. Тата си хорам, тащаң па вещкат муван верам хорат вантаты па умасьӆыяты. Еӆӆы пеӆа, сита верты уйтантопсая ун хоятат па няврэмат ёхтыӆыяты, хоӆ ияха ханты уӆапсаев еӆӆы туваӆан.
Альбина Тырлина ханшам потар
Авторы
Лух Авт
Темы