обновлено: 11:28, 23 июля 2026
Лух Авт
Ӆорвош район – хуӆаӊ веӆпасӆаты мув
Там мосванан хуӆ веӆпасӆаты ёх емаӊ хатӆэӆ постасэӆ. Горковской рыбозаводан Ӆорвош рыбоучасткан рупитты хоятат Ӆорвош куртан уйтантысат. Ванан уӆты куртыет эӆты хуӆ мосятты хоятат си веӆпасӆаты тахая ӆуӊтасӆат.
Мет апраӊ хуӆ веӆпасӆаты ёх
Ӆорвош рыбоучасткан рупитты куся ху Андрей Иосифович Кондыгин рупитты хоятӆаӆ эӆты потар тус: «Ма хуӆмет таӆ рупитӆам. Муӊ хосяев штат хуват хольмаӊ пеӆа хут хоят хуӆ веӆпасӆыман уӆ. Ӆапат хоят ӆуӊ сыс туп хуӆ мийӆыйӆ. Там таӆан таӆ сыс ярсот пеӆа кат тонна хуӆ мосятсув. Ӆуӊ сыс емаӊ хатӆ унты катсот пеӆа ӆапатъяӊ тонна хуӆ масув. Ин хоӆапӆув ӆоран омасман уӆӆат. Ар пелак питы хуӆ, айнайн сарах хойӆыйӆ. Пышьян шимаӆ хойӆ, ин хоӆна ӆаваӆӆув.
Кашӊ веӆпасӆаты хоятэв яма рупитаӆ. Мет оӆӊа веӆпасӆаты нэӊева ям ясаӊ ястаты утсиӆам. Сит — Арина Анатольевна Кельчина. Ӆув яӆап таӆ тыӆась эӆты ун кер тыӆась унты, катхосьяӊ моӆтас тонна хуӆ мосятас. Таӆ планаӆ тэкаптасӆы. Валерий Александрович па Мартын Романович Ребасьӊан таӆ сыс иси ар хуӆ масӊан. Планэв тэкаптаты ураӊан, ӆуӊ па сус пораев уӆ. Си пора унты мохиӆув аршак хуӆ мосятӆат».
Ай Ас хумпат хуват
Ёханован хуӆ мосятты хоятат иси Ӆорвош рыбоучастка ханшӆтаман уӆӆат. Си куртан ар таӆ хуӆ веӆпасӆыман Валерий Александрович Ребась рупитаӆ. Сикем потраӊ, няхаӊ, веськат хоят. Ёханован энмас па уӆ. Няӆъяӊ моӆтас таӆ хуӆ веӆман рупитаӆ. Уӆапсайӆ эӆты каматса ясаӊ ястас: «Муӊ куртэв ай куртые. Муйкем сита энампсам, иса хуӆ веӆман усам. Ӆуӊ порайн утся курта яӊхиӆыӆув. Ёханов эӆты хус километрайн уӆ. Туӊӆор нэмаӆ. Таӊха катра ӆор овӆаӆ туӊа мантсат. Еӆпи хоӆна катьрат, хопат тапиӆысат».
Веӆпасӆаты питсям порайӆ
Ханты хоятэв ашкуӆайн утаӆтымаӆ порайн веӆпасӆаты питас. Асеӆ рыпака ус. Ун яйӆ па веӆпасӆыйс, ӆувиӆаӆа нётас. Сит эӆты па потар тус: «Яӊ таӆ эӆты утся ай хопан яӊхты питсам. Хоӆпа манты мосаӆ, аӆаӊ нох киӆтаӆайм, вет сёс кеман. Си порайн ӆоваӆман яӊхсув. Ай хопна утся. Ащем-аӊкем, ун яем па уншак хопан. Уӆмев сыс рыпака иса усув.
Армияйн Дальний Востокан служитсам. Ёхи ёхатмеман, утаӆтыты манты утсисам, си вер ант артмас. Асем-аӊкем пирсясайӊан. Аӊкем сэмӆы питас. Сиӊанся утаӆтыты таха эӆты нох воӆысам. Мохты хуӆ веӆпасӆаты ӆэсятысам. 1982-мет таӆ эӆты ин там хатӆ унты хуӆ веӆман рупитӆам. Ай ёх пеӆа хоӆна ант эваӆӆам. Оӆаӊ тахайт ма си уӆӆам, такан хуӆ веӆман ешащӆам. Ай ёх хоты муӊ хосяев ванан ант ӆойӆ».
Яха хуӆ веӆман яӊхӆаӊан
Ёханован рупитты ёх таӆ сыс хуӆ веӆман уӆӆат. Хасям таӆан Валерий Александрович па Любовь Николаевна ийимеӆ пиӆан няӆъяӊ таӆа йис, хоты яха уӆӆаӊан. Яха хуӆ веӆман яӊхӆаӊан. Ийимеӆ Ӆорвош нэ. Нянь верты нэӊа утаӆтыйс. Куртан еша рупитас. Сяӆта ху сая манас, Ёханова касӆас. Си пора эӆты пиӆ хоятаӆа нётаӆ.
Валерий Александрович рупатайӆ эӆты ситы ястас: «Ӆуӊан Туӊӆоран уӆӆув, ӆоран хуӆ хоӆапан мосятӆув. Хун ӆорӆув сорӆат, нык касаӆӆув. Си порайн ноптаӆӆув. Еӆ куртэван хут, ӆапат рыпак ус. Катра «Ӆапат сохаӆ хота» Туӊӆор курт аяӆса. Сохаӆ хотӆув инты унты ӆойӆат. Хоятат сита хоӆна уӆӆат. Си хотат мосаӊ катсот таӆа йисат, мосаӊ па аршак. Сохаӆӆаӆ пусаӊан манман уӆӆат, сишан такат. Аӆ вансям сохӆат».
Планэв тэкаптасэв
Хуӆ веӆпасӆаты хоятата таӆ сыс план хуват яӊ тонна хуӆ маты мосаӆ. Таӆ порайн, хой хуӆ шимаӆ мосятас, ӆуӊ сыс планаӆ тэкаптаӆӆы, мосаӊ па аршак мосятты верытаӆ. Хоты си вер манаӆ, ханты хоятэв ситы ястас: «Муӊ планэв тэкаптасэв. Сус унты хоӆна хуӆ веӆман ешащты питӆув. Ин катхосьяӊ тонная йис ки.
Хасям таӆатан кашӊ тыӆась аванс па хуӆ ураӊан сохаптаты охан мийӆыты питсаюв. Муй кем хуӆ веӆӆан, си арат ох шитӆан. Моӆты порайн аршак этаӆ, тухаӆ ишан щах шимаӆ.
Муӊ оӆӊа Мужевской совхоза ӆуӊтассув. Хун пуӊӆа вусаюв, ма мохты куртаӊ мохиӆам пиӆан Горковской рыбозавода ханшӆтантысам. Совхозан рупитмеман, хут таӆ бригадира усам. Куртэман мин Мартын Романович Ребась пиӆан кат рыбак хасьсаман. Ай ёхӆув хоӆ пуӊӆа мантсат. Мин муй, утаӆман уӆӆаман, ай тэӆан рупитӆаман. Хиӆыӆам рупитсат, воӆаӊ ант верытӆат. Утаӆман уӆӆан ки, нопсэн тохи уӆ ки, туп веӆси. Нопсэн тохи антом ки, муя си рупата верты».
Альбина Тырлина ханшам потар
