обновлено: 12:21, 10 ноября 2026
Лух Авт
Мув суӊев: Ӆорвош район йис уӆапса
Ешауӆ округев тыйм хатӆаӆ постаты питаӆ. Там лопасан потрэв манаӆ, хоты Ӆорвош район тыйс, хун округева ӆоӊаӆса, муй мув суӊ хося хантыӆув уӆты мув си еӆпийн ӆуӊтасас па хоты ин сита уӆты хоятат уӆапсаеӆ манаӆ.
Хун округев тыйс
Округев ван хатӆап тыӆась яӊмет хатаӆан 1930-мет таӆан тыйс. Си порайн ӆув Ямальской (Ненецкой) национальной округа нэматман ус. Воӆаӊ воша Обдорск курт ӆуӊтасас. Маты от 1933-мет таӆан Пулӊавта нэматса па 1938-мет таӆ эӆты вош нэм тайты питас.
Округев яӊкем таӆ сыс каматса областят хося пиӆтасьман ус — Уральской, Обско-Иртышской па Омской. 1944-мет таӆан Тюменской область хося ӆуӊтасты питас. 1977-мет таӆан автономной округа йис. 1992-мет таӆан Федеративной договор ханшман ус, си таӆ эӆты Россия хон мув субъекта ӆуӊтасаӆ.
Хантыӆув уӆты мув хоӆта ӆуӊтасас
Хой оӆӊа округеван ус, ар тахайн ар сирн ханшман уса. Ма па каматса ясаӊ верӆам. Хой мосаӊ ун хоятӆаӆан ястыӆыса, хоты Ӆорвош район, округев тыйс, газетаева матты ясаӊ верты верытӆаты.
Хутхосьяӊмет нупат (век) порайн, Ӆорвош район Овс мув пеӆа уӆты мувӆаӆ, там порайн сит Ёханкурт, Ӆорвош па Приуральской район Обдорской княжествая ӆуӊтассат. Уӆты мув кимаӆӆаӆ хатӆ омасты пелакан Кев унты усат, ным муван — Ямал мув тай, хаӆэват пелакан — Надым вош унты. Си юпийн си тахайт Русской Царства хося ӆоӊаӆман усат. Воӆаӊ воша Пулӊавт ус. Хутхосьяӊмет нупат унты си тахайт, хувн уӆтэӆ ураӊан, ёрая усат.
1563-мет таӆан Обдорской канасят Кучум хон хося пиӆтасьсат. Сит Чингисхан хиӆэт хиӆы, Сибирской ханство канась ус. Кучум ики Иван Грозный хона таӆ сыс йи сёрс нёхас мийӆыты вераӆ ус.
Си порайн казачий атамана уӆам хоят Ермак Тимофеевич Сибирь вуты манас, Топоӆ ёхан хося Кучум хон хоятӆаӆ паятсэӆ. Си пора эӆты хатанят па остякат ясак ӆувеӆа мийӆыты питсат. 1585-мет таӆан Обдорской княжества Россия хон мува ерамты питас.
1595-мет таӆан Пулӊавт вош уӆты тахайн русят Обдорской острог омассат. Си пора эӆты тайты тахайӆаӆ Сумат уезда ӆуӊтасты питсат.
Муй пора эӆты Ӆорвош района йис
1930-мет таӆан Хон мув Центральной Исполнительной Комитетан партапса верман ус, нийӆ национальной автономной округ верты.
Округев хуӆамхосьяӊ муниципалитет тайӆ. Ӆув кутэӆан Ӆорвош па Приуральской районӊан. Ханты хоятӆув ар пелак сита уӆӆат. Кашӊ симась таха ӆув герб, вотвой тайӆ. Муйн муваӆ тащаӊ, сита альман уӆ. Ӆорвош районан Кунавт заказникан торат уӆӆат. Катра порайн вой энмаӆты тахайт усат, арсыр войт энмаӆтысайт. Йис пора эӆты Ун па Ай Асан уӆты хоятат хуӆ веӆпасӆыман усат. Сишан Ӆорвош район герб па вотвой хося тор, лэпак па сух хуӆ хоран этаӆтыман уӆӆат.
1937-мет таӆ унты Ӆорвош район Остяко-Вогульской мир ёх округа ӆуӊтасас. 1944-мет таӆан Омской область эӆты округева ӆоӊаӆса. Муя Ӆорвош района нэматса? Хун Обдорской района ӆоӊам тахайт яӆпитсайт, Ӆорвош курт воӆаӊ воша понты вер ус.
Си еӆпийн, 1927-мет таӆан яӆап таӆ тыӆасян Обдорской районан Ӆорвош туземной совет Ӆорвош куртан ус. Сяӆта, 1934-мет таӆан, хун национальной округат Омской областя мийман усат, воӆаӊ воша Мужи курт понтса.
Там пора уӆапса
Ин Ӆорвош район — сит хорам, тащаӊ мув. Хоятат уӆапсаеӆ па муватан уӆты мохет иты ӆаварт ус. 1930-мет таӆатан Ӆорвош мува хон мув суӊат эӆты ар хоят, таӆаӊ хоттэӆатан, вурты ёхан шук туты китыӆысайт. Ар пелак ёх сита уӆты хасьсат.
Воӆаӊ Ляль манам порайн, район эӆты 1634 хоят ляля китыӆыса, 494 — антома йис, 137 — веккеша ушас. Ляль етшам юпийн, сита уӆты хоятат хуӆ, вой веӆман усат, вуӆы шавиман рупитсат, няврэм энмаӆтысат па утаӆтысат, уӆты хотат омассат.
Йис пора эӆты сита шоши мир хоятат уӆӆат. Тураман мийм хорам, тащаӊ муван там пора унты уӆапсайӆаӆ, сирӆаӆ-пищӆаӆ шавиӆат па еӆӆы туӆат.
Альбина Тырлина ханшам потар
