Лух Авт
Ӆорвош район вуӆэӊ ёх емаӊ хатӆ
Хащам ӆапатан 13 па 14-мет ай кер тыӆащ хатӆатн вуӆы тащ шавиты ёх мойӊ хоятат пиӆна хув ӆавӆам емаӊ хатӆэӆ постасэӆ. Щи вантапса па касапса хар Мужи вош леп Ханты-Мужи куртна ӆарпиӆыса.
Емаӊ хатӆ кеша Ханты-Мужи курт пуӊаӆна, посӆ па пелакна пухар ӆонщ эӆты сыстамптам. Щита ун вантапса па касапса харт ӆэщатомат. Таӆаӊ 20 моӆтас урхот ӆонщам: щи кутан няврэмат хатӆ сыс шавиты хот, леккар хот па арпелак мойӊ хоятат кеша ӆэщатом хотат. Щаӆта няврэмат кеша ун ёнтапса лот верам. Вуӆэӊ ёх ураӊна нэман ун палатка ӆонщам, хота рахас хошмаӆтыты, ӆэты па шай йинщты.
Щи тумпина ун тынасты лотат йи юпина омпсантамат. Няӆъяӊ моӆтас тынасты ёх Россия хон мувев эӆты ёхатмеӆ. Щаӆта Ямал мувев ӆоват эӆты ищи тынасты хоятат пормасӆаӆ па ӆэтотӆаӆ алиӆысат: Мужи, Ӆорвош, Питӆор, Горка вошат па Кев сыӆ, Ямальской районат эӆты.
Оӆаӊ хатаӆна аӆаӊ эӆты вуӆэӊ ёх кеша собраний верса, хота хащам таӆ рупата эӆты потарса: муй арат вуӆы энмаӆса, муй арат хорты маса, па хоӆна муй мосаӆ верты рупата верт туӊа-щира ӆэщатты ураӊна. Щаӆта еӆӆы, ёх па нэӊат касты питсат: ӆохна хухаӆсат, тынщаӊ ёваӆсат, ухаӆ шоппи наварсат па юх катна таӆман юращсат. Етна пелка па Мужи вош каш верты хотна ун концерт ӆэщатса па ар рупитам хоятат мойӆаптасаят.
Кимет хатаӆна, аӆаӊ эӆты емаӊ хатӆ еӆӆы постаты питса. Оӆӊа, хорамаӊа кирам вуӆэӊ ухӆат этаӆтысаят — щиты хускем ухаӆ онас иты вантапса хар кутан, ӆарыман, мантсат. Щи юпина па щи касты лотат пуншсаят. Посӆ хоща нэӊат па ёх вуӆэӊ ухӆатн ӆэӆамтысат 1600 метра щира. Аратӆ 26 ухаӆ: 14 — ёх па 12 — нэӊат. Щаӆта ищи щита этнобиатлонна кассат — щит хун ӆохна хухаӆӆан па тынщаӊ сува ёваӆмаӆан. Щаӆта хоттэӆ ёх кутатн эстафета ус. Етна пелка па мет юраӊ ёх пертащман юращсат.
Касапсаятан оӆаӊ местаят тамиты питсат:
Константин Талигин, Вячеслав, Станислав па Эдуард Лонгортоват — ӆохна хухаӆӆан па тынщаӊ сува ёваӆмаӆан;
Лонгортовы — хоттэӆ ёх эстафета щирн;
Дмитрий Валей — пертащман юращман;
Юлия Лонгортова — нэӊат кутан вуӆэӊ ухӆатн ӆэӆамтыман;
Эдуард Лонгортов — ёх кутан вуӆэӊ ухӆатн ӆэӆамтыман;
Надежда Талигина — мет хорамаӊ вуӆэӊ ухаӆ;
Ольга Куртямова — «Тус ёш нэ».
Щиты, мет тынаӊ мойӆапсаят — «Буран. Лидер» нэмпи ӆонщхопат няӆмет тащ сельскохозяйственное предприятие «Мужевское» Щаня мув пеӆа мантсат.
Иван Сандрин ханшам потар
Авторы
Лух Авт
Темы