Лух Авт
Овас айӆат ёх арсыр верата утаӆтыты питӆат
Ясаң ёхтас, Сургутской государственной университет хоща Овас мир айӆат ёх арсыр верата утаӆтаты ураңан атэӆ институт пуншӆа.
Щит эӆты Сурханӆ государственной университет почётной профессор, университет Попечительской совет куща ху Александр Сидоров ястас: «Тамхатӆ муңева и номса ёхатты мосаӆ — муйсыр утаӆтаты таха ӆэщатӆув, муйсыр верата шоши мир айӆат ёх щита утаӆтаты питӆув. Тата Югра мувев айӆат ёх утаӆтыты питӆат муй па Ямал, Коми, Якутия па па Овас муват эӆты ёх ищи ёхатты верытӆат».
Югорской государственной университет хоща рупитты экономической наукайт доктор, профессор Владимир Куриков «Шоши мир айӆат ёх утаӆтаты вер» эӆты концепция постапса ханшас. Онлайн щирн мирхотан ястас: «Там йисн шеңк ям, хоты шоши мир айӆат ёх йис верат, щит вой-хуӆ веӆпасӆаты, вуӆы тащ ӆаваӆты вер, воньщамотат па па отат акатты верат, еӆӆы туӆат. Туп ӆый рыночной экономика щирн ӆув сахатэӆ верат туты ант хошӆат, щишн щи верата утаӆтыты мосаӆ».
Сургутской государственной университет ректор Сергей Косенок ясаң щиран, Овас мир айӆат ёх йис верат тумпийн там йис верата утаӆтыты па ӆаңхаӆайт, щишн муй верты иса мосаӆ, ӆуӆн муң университетэван щимащ институт ат тыйс. Ин оша пайтты мосаӆ, муй арат шоши мир няврэм округ ашкуӆаятан ун классатан утаӆтыйӆ па ӆувиӆаӆ тый вохты.
Сурханӆ ханты ясаң ӆэрамтты нэ Аграфена Сопочина ястас, институтан айӆат ёх ханты ясңа утаӆтаты ищи мосаӆ. Там университетан сурханӆ ханты ясаң ӆэрамтты учёной катңан Анна Главан па Аксана Таджибова рупитӆаңан, щишн ӆын айӆат ёх рут ясңа утаӆтаты верытӆаңан.
Ин щи институт пуншты ураңан мосты нэпекат ӆэщатты, утаӆтаты ёх, ашкулайт етшаптаты няврэмат каншты питӆайт.
Людмила Шульгина ханшам потар
Авторы
Лух Авт
Темы