Лух Авт
Овс мув хоятат юр артаӆыман
Хащам ӆапат щутщаты хатӆатан Ямал мувев мет юраӊ па каркам хоятат Новый Уренгой вошан актащисат. Хой мет юраӊ, апраӊ па харщи, касман артаӆысат.
Там касапса «Северной характер» нэмн понман уӆ. Ӆувеӆ ӆапатмет пуш верӆа. Йи таӆ сыс ӆув няӆ-вет пуш ӆэщатыӆа. Кашӊ касты ятаӆ ӆув нэм тайӆ. «Таӆ» па «Тови» ятӊан хащсат. Ин па «Ӆуӊ» пора ёхтас. Кашӊ таӆ аршак хоят касты хара пиӆтащийӆ.
Ущ тыӆащ 20-21-мет хатӆатан «Ӆуӊ» ята кат щёрас моӆтас хоят касты ёхтыӆысат. Округев тумпийн, хоӆна Югра, Свердловской па Тюменской мув сыӆат эӆты хоятат усат. Тампуш касты юшеӆ хувшака па ӆавартшака ӆэщатсэӆ. Юраӊшак хоятат 4 моӆтас километра йиӊки-вощлахаӊ юш хуват хухаӆман 32-мет пуш юш лап ертам хопалэт эӆты уншсат па ваӊксат. Веӆщи пиӆтащийм ёх шимаӆшак хухаӆсат — туп 3 километра еша антомшак.
Ханты хоятат ищи касты яӊхсат. Веӆщи пиӆтащийм хоятат кутан Ольга Кондыгина Пулӊават эӆты ус. Ӆув хуӆмет места шитас, вет щёрас соӆкувайн мойӆаса. Юраӊшак нэӊат кутан Нелли Куртямова кимет тахая этас, хольмаӊ пеӆа вет щёрас соӆкува шитас.
Ияха пиӆтащийм хоятат кутан «Адреналин» нэмпи команда Кев сыӆ район эӆты мет юраӊшак уӆмаӆ. Кимет места Новый Уренгой хоятат уймеӆ. Надымской район касты ёх хуӆмет тахая питмеӆ.
Иван Сандрин ханшам потар
Авторы
Лух Авт
Темы