Лух Авт
Овс мув хоятат ураңан верты нётопсайт
Хащам ятан, Хон Петра вошан, Овс мув нэңат оӆаңмет Форум верыӆыйм порайн, Овс мув шимӆаң мир хоятат уӆапса эӆты потартыяман, нётопса верат эӆты ищи потар манас. Щи веран муй хорпи нётопсайт там хатӆатан уӆӆат — щит эӆты ясаң верас Ольга Юрьевна Баталина Российской Федерация Министр труда па социальной защита щиран уӆты куща ӆаңкар нэ.
«Ӆув вер пуншты хоятат ар пелак тахи эӆты нётман тайӆайт. Индивидуальной предпринимателя йитэӆ порайн сот щёрас соӆкувайн нётӆайт. Кашң регион эӆты вантман, нётопса верытаӆ аршак уӆты. Щи тумпийн социальной контракт щиран ищи нётӆайт, сот ветъяң щёрасан. Кашң хоят атэӆ щиран вантӆа па мосты арат охан эсаӆӆа. Бизнес-планаӆ туңа щира артаӆаӆа. Мосты арат верты пормасаӆ, муй па веӆты вой-хуӆаӆ хоӆта пеӆа лакки манты питаӆ. Ар пелак эӆты вер ӆарпитӆа: семьяеӆан каман хоят уӆ, верэӆ пунштэӆ тумпийн муй арат ох тыӆащ сыс ёхтаптыӆат.
Российской Федерация Президент Владимир Путин постам щиран ар няврэмаң семьяйт, па няврэм тайты нушая уӆты семьяйт вантман тайӆайт. Мосты порайн иса нётӆайт. Патлам хотаң нэ вопиман тайӆа, па няврэмаӆ ӆапатхощъяң таӆ унты ищи вантман тайӆа.
Хус моӆтас таӆ кема йис, хоты нумасӆа чумработница ищи рупатайӆ ураңан щеп охан сохаптаты. Тухаӆ регионат локальной акт щиран туңматаӆ нэпекат тайӆат. Верыттэӆ щиран касӆаптыман яңхты нэңата нётӆат. Туп федеральной законата щи вер хонна ант ӆоңаӆса. Сельской хозяйства Министерства хоща Дорожной карта уӆ, еӆӆы нумасӆа воӆаң закона ӆоңаӆтыя. Ванты аратаӆ хон мувев ӆоватан касаӆман яңхты нэңат щеп охан ат сохаптасайт», — Ольга Юрьевна ястас.
Ямал муван касаӆман яңхты хоятат верытты кеман нётӆайт. Чумовой капиталан маӆайт, мосты пормасатан нётӆайт, ӆонщхопан па карты хопан яңхты кеша тут йиңкан эсӆыӆайт. Па регионатан тащна яңхты ёх ар пелак атэӆ яңхӆат, нэңӆаӆ ант касӆыӆат. Щи веран вуӆы тащат шимӆамаӆат, вой-хуӆ ант веӆпасӆаӆат. Нюки хотэӆ потам, кавартам ӆэтот антом, морам сохеӆ нэмоӆты хоятан ант кертыӆа, ант сораӆтыӆа.
Щи веран тамащ атом ята ант питты ураңан, аратаӆ кущайӆува мосаӆ яха понасты па нэңат рупата сохаптаты. Щи порайн шоши мир ёх уӆапса ант хурӆаӆ па еӆӆы уӆмитаӆ.
Аллина Тоярова ханшам потар
Авторы
Лух Авт
Темы