Лух Авт
Овс мув нэңат Хон Петра вошан Форума актыӆысайт
Там ӆапатан, 5-7-мет хатӆатан, Хон Петра вошан Овс мув нэңат Форума актыӆысайт. Ветсот моӆтас воӆаң нэ щий 28 регион эӆты ёхтыӆыйс, няӆъяңкем мир ус. Ямал мув эӆты нийӆхус нэ яңхас.
Мет оӆаңмет Форум РФ Совет Федераций Федеральной Собрание куща нэ Валентина Матвиенко пуншсаӆӆы. Воӆаң нэңат мойӆаптасӆы. Ёмвош округ эӆты Раиса Решетникова, «Торум Маа» этнографической музей научно-исследовательской па методической отдел куща нэ, ханты мир уӆапса нох аӆамтаӆ ураңан па Ямал эӆты Галина Матарас, «Минлей» общественной организация куща нэ, ур ёх уӆапса нох аӆамтаӆ ураңан Благодарность нэпекатан мойӆаптасӆы.
«Там хотан актащсат щи нэңат, хой ӆув мираӆ шеңк мосмаңа тайӆаӆӆы, мираӆ уӆапса, ясаң еӆӆы туты ураңан па па мирата щит эӆты потарты ураңан. Аратаӆан Овс муван энергетической па промышленной проектат паты унты туӆайт. Северной морской путь такан рупитаӆ, мув сайӆаты щиран ар проект верман уӆ. Вошатан шоши мир уӆапса шавиман тайты ӆавартшак питас, туп нын ищипа щи веран рупитӆаты. Щит иса Овс мув нэңат эӆты ӆойӆ, нын онтасанан Овс муван уӆапса ант хурӆаӆ», — РФ Совет Федераций Федеральной Собрание куща нэ ястас.
Каматса ясаң Ямал мув делегация эӆты «Ямал-потокам!» Ассоциация хоща рупитты нэ Елена Рыбина ястас: «Муң делегацияева ӆоңман уӆӆат щи нэңат, хой бизнес, леккар верат, общественной рупата, хой ӆув ёра вераӆ туӆӆы па мира этаӆтаӆӆы. Кашң уйтантопсая пиӆтащсув, муң постам верӆув резолюцияя ӆоңаӆтсув. Рут ясаң, касӆыман яңхты хоятат мув харат, тумтак уӆапса, государства эӆты мийӆыты нётопса секцияята иса яңхсув па хуӆантсув. Ёхи ёхаттэван щит эӆты аратаӆ мира потарты питӆув».
Тамащ уйтантопсайт онтасан шоши мир уӆапса ант хурӆаӆ па еӆӆы манаӆ. Рут ясаң ант ёрэмаӆа, вератты-щукщатты вер ванан тайты питӆа. Овращӆув-щащиӆув уӆапса еӆӆы туӆэв.
Аллина Тоярова ханшам потар
Авторы
Лух Авт
Темы