Лух Авт
Овс мув шимӆаң мир хоятат ураңан маты нётопса
Хащам ятан ар ханшиӆыса па потартыса Овс мув шимӆаң ёх ураңан маты нётопса эӆты. Хоты верат Ӆорвош районан манӆат, щит эӆты отдел КМНС куща нэ Алёна Алексеевна Тогачева потар верас.
Касӆыман яңхты хуӆамсот семья щимащ нётопса вус. Хой хонна ант вуйӆыйс, мосаӆ куртаң утхота яңхты па щита нётопса вохты ураңан нэпек ханшты. Щи кеша щита понам хоятат уӆӆат. Ӆув очередь щиран нэпекат ӆэщатӆат. Щита ант ки нётӆайт, мосаӆ Ӆорвош район Овс мув шимӆаң мир хоятат пиӆан рупитты отделенияя ясаң вертыя.
«Ӆорвош районан касӆыман яңхты хоятат сохаӆан, хот ӆоңаӆ лаңкты картыйн, сохӆа ёварматы картӆуңкан, хоӆапан, нюкийн, нуйн па па хорпи пормасатан маӆайт. Аратаӆан 23 арсыр пормас нэм постаман уӆ.
2023-мет таӆан металлочерепицайн 56 семья мийман уса, щит 3073 кв. метра. 66 семья 330 киӆа картӆуңкан масӆув. Ин кашң семья 44 сохаӆан маӆӆув. Нови тут хошапат рупитты ураңан маты тутъйиңка щёрас 1750 соӆкува маӆа. Кашң тыӆащ 5000 щёрас соӆкува ёша пайтӆат, касӆыман яңхтэӆ ураңан. Щи верат иса щи кеша ӆэщатам нэпекатан постаман уӆӆат. Тамащ нётопсайт округ ӆоватан рупитӆат.
Яӆап таӆ тыӆащ 1-мет хатӆ 2024-мет таӆ вуш эӆты тынат эӆатсайт, щишан ин «чумовой капитал» — 603000 соӆкува. Хой мосаң ӆув юрэӆан юх эватты карты ӆутас, ёхӆы 16640 соӆкувайн маӆайт, тут маты хошап сахат — 17160 соӆкува.
Туняӆ «чумовой капитал» кат семья вус, там пуш хуӆам семья нэпекӆаӆ ӆэщатсат. Тащан яңхты хоятат кеша атэӆ нётопса ханшӆтаман уӆ, хуӆ веӆты хоятата па па хорпи нётопсайт ханшӆтаман уӆӆат. Там хатӆатан Мушия ветъяң пеӆа вет рупитты хоят ӆуңтасаӆ, Питӆора па хольмаң пеӆа яртъяң. Щи тумпийн ар уна ювам хоят ищи касӆыйӆ», — Ӆорвош район отдел КМНС куща нэ Алёна Алексеевна ястас.
Ма щита уӆмем сыс Михаил Семёнович Озелов Восяхово эӆты хоӆап вуты ёхтыӆыйс, кимет хатаӆан па Егор Петрович Пырысев Ямкурт эӆты сохаӆ ураңан ёхтас. Нётопсайң рупата ныӆа, шошия уӆты кущайӆув мирэӆ эӆты нумасман шеңк такан рупитӆат. Щит шеңк ям вер.
Аллина Тоярова ханшам потар
Авторы
Лух Авт
Темы