Лух Авт
Приуральской район тус ясаӊ ныӊ
Муӊ мувув сэӊк тащаӊ тус ясаӊ ныӊатна. Йи щимащ ныӊ Приуральской районна ол, нэмаӆ Ирина Ягиевна Серасхова, ӆув Охсар похална ол. Маина Ягиевна апэӆ пиӆна похална ор хат тайӆаӊан.
Щита ӆын вуӆ пелак нэӊхэт па нявремат эӆты ханты нэӊхэт олапсы пущщи лаваӆӆаӊан, эттаӆӊан, сайна енщтаӆӆан. Ирина апэӆ пиӆна ай тэӆна йинтаста хасӆаӊан. Касаӊ ӆын верты масайӆан хоща, ялӆаӆ туӊ ёс иты манӆат.
Ирина ниӆ няврем тайӆ, мет вуӆ эвеӆ ниӆхощъёӊ таӆаӆ. Аӆ олты хатӆатна йинтасӆ, нявремӆаӆ тун каратта, сувенират верта онттаӆ, вуӆӆы йитэӆна ищи верта ат хасӆат.
Ӆуӊан Ирина хаттэӆаӆ пиӆна Охсарка хощаӊа ор хатна хуӆ веӆман оллат, таӆ пеӆа хуӆ сараӆӆат, соӊх верӆат, рэх акатӆат.
«Муӊ щирӆу-пищӆу савиман тайӆаӆӆу, нявремӆу ищи муӊ итыӆу мала аса верта ат хасӆат, муӊ олапсэвна-хоты муӊ осув олта ат веритӆат. Муӊ хоты? Ай тэӆна хат ӆыпи ропата верта хассу, мала верта парӆайн, аса верӆан. Юх сэварта, йиӊк туда, вас сохата, ӆытыт каварта, щит аса ныӊ ропата. Итта там йис нявремат самӆаӆ щимащ ропата пеӆа ант хойӆат. Хасам хатна олта онӆам атат, ӆувиӆаӆ щёкат. Вуӆсак ныӊ нявремӆам итта ханты сох соматта яӊатӆайт, щиты хонт олта масӆ. Онттада масӆат, ханты олапсы савиман тайта. Ӆув ротэӆ алӊищ тута», — Ирина Ягиевна лавас.
Тампус ӆуӊан Ирина Ягиевна «Ямалица» хоща верам масайӆаӆ эттас, верта хасты ныӊат пиӆна кутӆаӆна кассат. Ӆув «Коллекция летней традиционной национальной одежды» номинация хоща заявка китыӆыйс, нийӆъёӊ заявка кутна пирыса.
Вера Лонгортова хансам потар
Авторы
Лух Авт
Темы