Лух Авт
Проектат ӆэсятыйӆ, грант охат шитыӆыйӆ
«Российский Север» касапсая Иван Эдуардович Сандрин каматса пуш ёхтыӆыйс, проектат ӆэсятыйс па грант охат шитыӆыйс. Рут ясӊев шавиты па еӆӆы туты ураӊан ӆув ун рупата вераӆ. Кашӊ порайн яӆап харатан рупитаӆ, яӆпа ёхтыӆыты энамты няврэмата уйтты па хошты верӆаӆ эӆты потартыйӆ.
Там манам уйтантопса эӆты каматса ясаӊ ястас: «Там пуш ма рут ясаӊ харан рупитсам. Сита рут ясӊеӆ шавиман тайты няврэмат уйтантысат, еӆӆы утаӆтаты ӆытӆайт па компьютер, интернет хуват проектат яӆап сирн ӆэсятты па этаӆтаты утсиӆат. Симась уйтантыты тахаятан, хой рут ясӊаӆ утаӆтаты ӆытӆа, ар хорпи проектат верты рахаӆ. Там харан няврэмат кеша кашӊ эви, пох ӆув рут ясаӊаӆан карточкайт верас. Ма вуӆы ёх пормасат эӆты ясӊат пирысам па ханшсам. Хун моӆты ясаӊ няврэма ястаӆан, си карточка ёша вуты мосаӆ, русь ясаӊан ястаты па каматса ясаӊ си ясаӊ эӆты потарты. Ситы еша ханты ясаӊ утаӆтыты рахаӆ.
Ты кашӊ регион эӆты энамты няврэмат ёхтыӆысат. Ӆув уӆты мувӆаӆан, муӊ итаев, энамты ёх ясӊеӆан воӆаӊ потарты ант хошӆат. Сишан там йисан, муй си ураӊан верты мосаӆ, яӆап сират каншты питсув. Ма сита ястасам, муй ма верты ӆаӊхаӆайм. Телефон хося верты приложенияйн ханты монсят понты. Сит ураӊан ветсот сёрс соӆкува ох мосаӆ. Ма симась грантовой проект ханшиӆысам. Ин кашӊ хоят телефон тайӆ. Тащ хота яӊхты порайн, вантӆан, ай няврэмиет телефон хуват мультикат вантӆат, ёнтӆат. Хун симась приложение верӆа ки, ай няврэм телефон хуват ханты ясаӊан ӆуӊатты, хуӆатты, вантты верытаӆ.
Там пуш шоши мир ёх хус моӆтас заявка нэпек китыӆысат. Си еӆпийн ма кат проект этаӆтысам, охан мийӆысайм. Ин си рупатаем еӆӆы туты утсиӆэм. Яӆап проект сирн, си приложение хося ханшты ханты хоятӆув потрат ӆоӊаӆман уӆты питӆат. Роман Прокопьевич Ругин ӆуӊатты па хуӆантты ки утсиӆан, нэмаӆ ханшӆэн. Сита ӆув ханшам потарӆаӆ ханты ясаӊан этӆат. Нэпек ӆуӊатты хотатан ханты нэпек ханшты хоятӆув монсьӆаӆ, ӆуӊтарӆаӆ, потарӆаӆ понман уӆты питӆат. Иса яха акатӆаӆӆам, туӊа сира ӆэсятӆаӆӆам (оцифрую) па номас понмем сирн верӆаӆӆам.
Хой сэмӆаӆ вевтамат, сита тайты кнопкая нёртапты верытӆат па ханты ясаӊан хуӆантты. Русь ясаӊан ханшам монсят па понман уӆты питӆат. Сита хоӆна ар рупата верты мосаӆ. Программистат вохты. Кашӊ проект хося ма пиӆэман рупитты хоятат уӆӆат. Яха рупитӆув. Хой толмащаӆ, хой хор ханшаӆ. Газета хуват манэма нётты хоятӆама ун пумасипа ясаӊ ястаӆам».
Альбина Тырлина ханшам потар
Авторы
Лух Авт
Темы