Лух Авт
Родовой общинайн рупитаӆ
Наталья Ирган Ёмвош округ Белоярской вош эӆты ёхтыӆыйс. Аӊкеӆ-асеӆ пиӆан родовой общинайн туризм сирн рупитаӆ. Си тумпийн «Спасение Югры» общественной тахайн рупатайӆ туӆ, ханты группая яӊхаӆ, куртан манты емаӊ хатӆатан, уйтантопсаятан нётаӆ.
Сит эӆты потар тус: «Си еӆпи аӊкем-асем хуӆ веӆман усӊан. Ин туризм сирн рупитӆув. Аӊкем ханты нэ, асем — немась. Куртэв сот няӆъяӊ километрайн Белоярской вош эӆты уӆ. Сумат нёӆ нэм тайӆ. Полнават па Ванзеват кутопан ӆойӆ. Таӆан ӆонщхопан яӊхӆув, ӆуӊан — хопан.
Муӊ хосяев ёхтыӆыты мойӊ хоятата уӆты мувев, уӆапсаев эӆты потартӆув, альӆув, пормасӆув этаӆтыӆӆув. Ӆуӊан шай ураӊан торнат, лыптат акатӆув. Таӆан тыныӆӆув.
Там уйтантопсайн ма туризм хара ханшӆтантысам. Ёхатмем порайн, имидж хар эӆты хуӆсам. Сита хоятат сох эватты па ёнтты утаӆтасайт, си хара мантсам. Туризм сирн ма ар пелак уятӆам. Си харан па, хоты ёнтасты рахаӆ хуӆсам. Ёнтасты вер ма рупатаеман шеӊк мосмитаӆ. Муӊ хосяев па мув хоятат ёхтыӆыӆат, пормасат, сохат ӆутӆат. Си харан вантам па хуӆам верат еӆӆы рупатаеман ӆэсятӆам.
Ты ма проектӆы ёхатсам. Нэпекӆам па касапсая китман уӆӆат. Сита юх, ӆов, лыптат, вонсямотат па торнат эӆты верам рупатайт. Ма шеӊк ар там уйтантопсайн хуӆсам па вантсам, ар вер нопса понтсам. Рут ясӊев еӆӆы туты ӆытӆайм. Муӊ уӆты тахаеван си рупата туты мосаӆ. Энамты ёх рут ясӊеӆан ант потарӆат».
Альбина Тырлина ханшам потар
Авторы
Лух Авт
Темы