Лух Авт
«Российский Север» форума ӆэсятыӆат
Ас потты тыӆасян хольмаң пеӆа оӆаңмет хатӆ эӆты хольмаң пеӆа няӆмет хатӆ унты Пулңават вошан Овс мув, Сибирь па Дальний Восток шимӆаң мир айӆат ёх яха хуӆмет пуш уйтантыӆат.
Си уйтантопсая шимӆаң мир рут ясңеӆ па уӆапсаеӆ пеӆа самӆаӆ хошиты айӆат ёх, предпринимателят, вератты хоятат, этноблогерат, общественной организацияйт лидерат, хон мув па регионат айӆат ёх кусяйт, хой рупатаеӆ шимӆаң мир хоятат уӆапсаеӆ, верӆаӆ па ясңат шавиты па еӆӆы туты пеӆа манаӆ, ёхатӆат. Си тумпийн Арктика па Дальний Восток рупата мет мосмаңа тайты инсясапсайт пиӆан рупитты общественной деятелят па учёнойт йиӆат.
Там пуш сот моӆтас хоят округеван ӆаваӆӆа. Уйтантопсайт вет харан рупитты питӆат: рут ясңат шавиты па еӆӆы туты, арыты па якты, предпринимателят па медиа хар, «Российский Север» лидерат. Форум манты хатӆатан тренингат, лекцияйт, дискуссияйт, мастер-классат, презентацияйт па сютсяты па каш верты уйтантопсайт ӆэсятӆайт.
Международной яңмет шимӆаң мир ясңата постам таӆат, 2032-мет таӆ унты манты питаӆ, рут ясңат шавиты па еӆӆы туты рупитты хар мет мосмаңа па вантман тайты питӆа. Си направлений хуват ӆув уӆты тахайӆаӆан рупитты айӆат ёх рупатаеӆ эӆты потарӆат, альӆат. Си няврэмат пиӆан федеральной уровнян рупитты хоятат рупитты питӆат.
Ханты энамты ёх аршак си уйтантопсая ат ёхатаӆ, сора мосты нэпекат ат китаӆ.
Альбина Тырлина ханшам потар
Авторы
Лух Авт
Темы