обновлено: 04:17, 06 декабря 2023
Лух Авт
«Российский Север» форуман ӆэсятам проектат
Шимӆаң мир энамты ёх форума ёхтыӆыйм айӆат ёх уӆты тахайӆаӆа хуван мантсат. Уйтантымеӆ порайн няӆ хатӆ сыс еңта пасанат, вантопсайт, уйтантопсайт верман усат. Си тумпийн ёхтам ёх вет харан рупитсат. Хасям хатаӆан верам проектӆаӆ этаӆтысат.
Шимӆаң мир ёх ясңат шавияты
«Шимӆаң мир ёх ясңат шавияты» харан вет эксперт вет тема хуват рупитсат. Си харан эвенкат, урат, селькупат, хантэт Ёмвош округ па Ӆорвош район эӆты па па отат усат. Ханты хоятӆув эӆты сита экспертата Алексей Конев па Дмитрий Кельчин рупитсаңан.
Алексей Эдуардович форуман рупитты пиӆӆаӆ пиӆан «Мастер па ученик» проект ӆэсятсат. Сита ясаң ант уятты охаль пох ханты ясңа утаӆтаса. Алексей ясаң верас: «Си проектан муң альсув, хоты рут ясңев утаӆтыты рахаӆ. Хой шеңк ӆытӆа, ясңаӆ утаӆтыты верытаӆ. Ӆапат сыс хуӆам пуш кат сёсан рупитты ки, иса тыйӆ. Утаӆтаты хоята рут ясңаӆ яма уятты мосаӆ. Шеңк ям питаӆ, хун хуӆам хоят рупитаӆ. Кат хоятаӆ потартӆаңан, альӆаңан, хуӆмет отаӆ хуӆаӆ па иса нопса понаӆ».
Рупатаеӆ нёхты хоран етшаптасэӆ, куся нэңеӆ русь ясаңан потартас, Алексей ханты ясаңан, Светлана Ивановна Тусида — ур ясаңан.
Дмитрий Кельчин пиӆан рупитты ёх «Полевой дневник» ӆэщатсат. Рупатаеӆ эӆты потартас: «Кимет таӆ эксперта усам. Ёхтам няврэмата потартсам, хоты ай потрат соцсетятан ханшты. Оӆаң хатаӆан «Ӆух Авт» газета потрат па шоши мир ёх ясаңан «Ямал-Медиа» нёхты хорат альсам. Си юпийн щи рупатайт пиӆан рупитсув. Кимет хатаӆан няврэмат ӆув кутэӆан рут ясаңан интервью версат. Хой нэпека ханшас, хой рут ясаңан нёхты хор верас.
Хоӆна округ каш верты энамты ёх эӆты потрэв тусэв. Хоты ӆув потратан, аратан, якатан, нарас сыйн, нёхты па ханшам хоратан ясңев па уӆапсаев этаӆтыӆэӆ. Хоты рупатайт этаӆтыты па еӆӆы туты, медиа хуват альты утаӆтасӆам».
Мужи вош эӆты си харан Илья Ребась ус. Ӆув Вячеслав Иванов куратораӆ пиӆан ӆапат ясаңан хус указатель ӆэсятсаңан. «Полярис» па Национальной нэпек ӆуңатты хотңан хося ӆэсятты рупатайт шияӆаты рахаӆ.
Хоятат верам от еӆӆы туваты
«Продвигай народное» («Хоятат верам от еӆӆы туваты») направление хуват ёхтам няврэмат утаӆтасайт, хоты верам рупатайӆаӆ тыныты хошты мосаӆ.
Сит эӆты проект туты нэ Анна Гуринчук ястас: «Там уйтантопсайн муң ар ошаң энамты ёх пиӆан уйтантысув. Си тумпийн няврэмат пиӆан рупитты спикерат па экспертат пиӆан рупитсув, яӆап проектат ӆэсятсув».
Си харан Овкурт эӆты Елена Куртямова ус, каматса ясаң верас: «Трэкан муң потар тусув, хоты ёшан верам рупатайӆув тыныты ураңан ям хор вертыя мосаӆ, хорамаңа ханштыя па социальной сеть хуват этаӆтытыя. Проектат этаӆтыты порайн кашң хоят ӆув ӆэсятты пормасаӆ аляс. Хой ёнттот, хой ӆэтот, хой ёнтам сохаӆ, верам пормасаӆ. Ма сак эӆты картам сакпаӆат, саклопсат этаӆтысам».
Нёхты хор ӆэсятты харан
Папуш «Российский Север» форум яң таӆа йиӆ. Там пуш Медиа-харан рупитам хоятат шимӆаң мир ёх па форум гимн эӆты нёхты хорңан ӆэсятсат.
Си харан модератора уӆам ху Евгений Жуков манам рупатаеӆ эӆты ясаң верас: «Томской киностудияйн рупитты хоятӆам пиӆан ты ёхатсам. Художественной, документальной кинайт, фестивалят, социальной проектат ӆэсятӆув. Хун веӆси рупитты питсув «Росмолодёжь» эӆты грант ох нётапса шитсув.
Там харан ёхтам няврэмата альсув, хоты нёхты хор верӆа. Ӆув кат группайн рупитсат, пирысат, муй верты ӆытӆайт: нёхты хор, реклама, арыты, якты клип, документальной кина. Си тумпийн хоӆна тема пирысат, презентация версат. Тата ӆув ван нёхты хорат ӆэсятсат па этаӆтысат. Ӆэсятам нёхты хорңан хуват папуш документальной кинайңан верты па альты верытӆат. Проектӆаӆ туңа сира ӆэсятты па «Росмолодёжь» эӆты нётапса шитты».
Альбина Тырлина ханшам потар
