Лух Авт
«Российский Север» яӊмет таӆаӆ постаӆӆы
Там пуш «Российский Север» форум яӊмет пуш верӆа. Ас потты тыӆась хусмет хатӆ эӆты хольмаӊ пеӆа хуӆмет хатӆ унты Пулӊават вошан Овс мув, Сибирь па Дальний Восток сот хольмаӊ пеӆа няӆ шимӆаӊ мир айӆат ёх яӊ республика, яӊ область, вет край, няӆ автономной округ па кат воӆаӊ Москва па Хон Петра вошӊан эӆты яха уйтантысат.
Си уйтантопса 2015-мет таӆ эӆты хон мув вошатан маныӆыйс. Няӆмет таӆ муӊ округеван верӆа. Еӆӆы пеӆа кашӊ порайн Овс мув, Сибирь па Дальний Восток шимӆаӊ мир энамты ёх Пулӊават воша форума ёхтыӆыты питӆат.
Яӊ таӆ сыс шоши мир уӆапсайӆаӆ па рут ясаӊӆаӆ пеӆа мет тусаӊат, вераӊат па самӆаӆ хошиты няӆхосьяӊ таӆ эӆты хольмаӊ вет таӆ унты энамты хоятат яха уйтантыман, яха ӆэсятты верӆаӆ эӆты потартсат па эталтысат.
«Российский Север» форуман программной кусяя уӆты нэ Инесса Яунгад каматса ясаӊ верас: «Кашӊ таӆ там уйтантопсая ар шоши мир ёх ёхатты утсийӆ. Там пуш нийӆсот заявка нэпек китман ус. Кашӊ хоят китам рупата, мет шопаӊ, ӆув ёра номас тайс. Шеӊк ӆаварт си ар хоят кутан мет тусшак, апраӊ хоят пирыты. Туп сот хоят мосас вуты.
Ёхтам хоятат вет направление хуват рупитсат: энамты ёх верат, шимӆаӊ мир ёх ясӊат па уӆапса, ӆуматты сохат эватты па ёнтты тус хоятат, этноблогерат па экскурсоводат актащисат. Росмолодёжь касапсайн нох питам энамты ёх йи миллион ветсот сёрс унты грант ох шитсат».
Форум манты хатӆатан дискуссияйт, мастер-классат, презентацияйт, сютсяты па каш верты уйтантопсайт ӆэсятман усат, вуӆы тащ хота тутӆысайт. Энамты ёх ещаӆ «Российский Север» форум куся ху Кирилл Литвинов, округ кусяев Дмитрий Артюхов, Овс мув шимӆаӊ мир, Сибирь па Дальний Восток Ассоциация куся ху Григорий Ледков, Хон Петра вош А. И. Герцен нэмпи Российской государственной педагогической университет Овс мув институт куся нэ Софья Урун, Югра профессиональной образование шимӆаӊ мир ёх Институт куся Ольга Муллер па па университетат куся хоятат потар тусат. Си тумпийн туризм сирн рупитты ёх, «Российский Север» форуман па Россмолодёжь проектатан нох питам хоятат пиӆан уйтантысат.
Альбина Тырлина ханшам потар
Авторы
Лух Авт
Темы