Лух Авт
Рупатайӆ самаңа тайӆаӆӆы
Муш ёхатты пора нэмоӆты хоят ант ӆаваӆаӆ. Шаңкап кашаңа йиты порайн турмен патлама йиӆ. Туп еӆӆы уӆты па мосаӆ, турам ураңан нэмоӆты хоятан ант тайӆайн. Ӆэтот кеман ох шитты па мосаӆ.
Щит ураңан 1995-мет таӆ эӆты утхот нэпек рупитаӆ, хота ханшман уӆ, муш тайты хоятат верытты кем рупатая вуты. Кашң куща, хой хольмаң вет хоят эӆты сот моӆтаскем хоят рупатайн тайӆ, щи хоятат кутан хуӆам процент муш тайты хоят ат ус. Маты организацияйт хоща шимаӆ хоят рупитаӆ, щиты верты ант мосаӆ. Туп рупатаеӆ кен па сопас рупитты хар тайӆат ки, хоят верытӆат вуты. Щимащ рупата маты харат кашң вошан уӆӆат.
Ӆорвош районан утхот нэпекат шавиты хотан Иван Владимирович Лонгортов хуӆмет таӆ рупитаӆ. Ӆув рупатайӆ эӆты каматса ясаң ястас: «Там рупатая квота хуват вохсайм. Уӆапса еӆӆы манты щиран катра уӆапса ищи нумман мосаӆ тайты. Щит ураңан ма рупатаеман катра пора нэпекат электронной щира понӆаӆӆам. Хува ювам нэпекат оӆтэӆ хуват хахса нэпек хорпия йиӆат, поӆт иты лакки пуӆыӆат. Мосты нэпек шукат пиӆан хурыман, посаң ёшан рупитӆам. Хора вуты юпийн, кашң нэпек ӆыпеӆ муй потар тайӆ, ханшты мосаӆ. Щи юпийн электронной нэпекат шавиты архива китӆаӆӆам. Тата тайты нэпекат араң щиран мосаӆ шавиты, хот ӆыпеӆ мосты арат ёлах ат уӆ, йиңкан ант ат морӆайт, хатӆ ёшан ант ат восытӆайт. Ӆэвас хоятата тый ӆоңтыты па ант рахаӆ».
Иван Владимирович верты рупатайӆ шеңк самаңа тайӆаӆӆы. Муй яӆап щира вертыя мосаӆ — иса утаӆтыйӆ. Яма рупитты ураңан мойӆапса нэпекатан юкантман уӆ.
Зоя Куртямова ханшам потар
Авторы
Лух Авт
Темы