Лух Авт
Рупатайӆаӆан этаӆтыты ханты уӆапса
Там мосванан Канась куртан «Щукщатты пора» вантопса пуншса. Сита Елена Алексеевна па Наталья Яковлевна, Шульгин опрась нэм тайты Асов нэӊӊан, па Анастасия Никитична Сэротэтто Харсоим курт эӆты, ӆув ёшӆаӆан туса верам рупатайӆаӆ этаӆтыӆайт.
Си вантопсайн Анастасия Никитична, Елена Алексеевна па Наталья Яковлевна потарсат, хоты симась хорамат тыйӆат. Щашкан, нуй па вуӆы сох эӆты хорам ханшийн ӆэсятам ёх хоят, няврэм, нэӊат ёнтам ернасат, охшамат, нуй сахат, моӆсяӊат, сахат, хуӆ поням эӆты ӆэсятам пормасат па ханшаӊ паркан эӆты сэвам посат, сэвам вайт сита умасьӆыты рахаӆ.
Таӆан тайты сохат туса ёнтаӆ
Анастасия Никитична Сэротэтто (Тользина) там вантопсайн ӆув ёщӆаӆан ёнтам таӆан ӆуматты ханты сохат: сахат, моӆсяӊат, вайт этаӆтысӆы. Уӆапсайӆ па пормасӆаӆ эӆты каматса ясаӊ верас: «Ма вуӆы хотан сэма питсам. Аӊкем-асем тащан яӊхсаӊан. Катра порайн, ун асем Николай Дмитриевич Тользин, Ёмвош округ Касам курт эӆты Приуральской нюрма касӆас. Аӊкаӊкем — Анна Павловна, Кондыгин рут эӆты. Икем опрась нэмаӆ Сэротэтто. Аӊкеӆ, аӊкаӊкеӆ па хантэӊӊан.
Ма ай пора эӆты вантсам, хоты аӊкем ёнтасаӆ. Нэмаӆ Ирина Петровна Кали. Ӆув манэм утаӆтасӆы. Муӊ ар няврэм усув. Ин туп нийӆ хоят хасьсув. Вет эви, хуӆам пох. Яйӆам хоӆ вуӆы шавиман уӆӆат. Ма икем па няврэмӆам пиӆан Харсойман уӆӆув. Хут няврэм тайӆаман. Катнэв студентӊан, хуӆам — ашкуӆая яӊхаӆ, ит садика.
Там вантопсая таӆан тайты сохат тусам. Сохӆам, хун курта касаӆсув ёнтсаӆам. Хун кум тайӆам — иса вератӆам. Кашӊ порайн ёнтасты ӆытӆайм. Сохӆам хоттэӆ хоятӆама ёнтӆаӆӆам. Няврэмӆама, икема — моӆсяӊат, вайт. Манэма па эвиӆама — сахат. Хасям таӆатан ай няврэмӆама тата этаӆтыты моӆсяӊӆам ёнтсаӆам.
Вантопсайн этаӆтыты сохат яӊкем таӆ сыс ёнтсаӆам. Похем уншака йис, вайн ёнтсэм, эвиӆам — буркайн. Манэма ёнтам хуӆам сах па ты тусам. Йи саха, ун вуӆы сохат ки уӆӆат, катӆэм тармаӆ. Аршак ханшийн ки ёнтӆа. Иӆтайӆ йи сохан тарамӆа. Ӆыпия па хуӆамӆэм-няӆ нёпилув сох. Ханшиӆам ёнтты ураӊан, татӆасты вер ки ант ӆуӊатты, тыӆась, мосаӊ шимаӆшак мосмитаӆ. Хун кашӊ порайн ёнтӆан, антом шеӊк хув.
Няврэмӆам вуӆы ёх емаӊ хатӆ шеӊк ӆаваӆӆат. Си порайн хоӆ хорам сохӆув ӆуматӆаӆӆув. Ма хун ай усам, иса си емаӊ хатӆ ӆаваӆсам, ин няврэмӆам — иситы».
Там мосванан туп вератты питас
Там вантопсайн Елена Алексеевна Шульгина нэӊат тайты сохат этаӆтыйс. Си тумпийн тонты эӆты, хуӆ поням сох эӆты хирыет тус. Хун пенсияя манас, си порайн туп вератты питас. Рупатайӆаӆ эӆты ситы ястас: «Сютсяты манмем юпийн, ёнтасты, сэвты питсам. Иса аӆаӊсахат эӆты иӆ оӆтэм унты омасты верытӆам. Эвиӆам энаммеӆ порайн, ин хоӆ ӆув семьяйт тайӆат, ернасан ёнтыӆысӆам. Там вантопсайн кат нуй сах, хуӆам ернас щашкан сах пиӆан ӆуматтыя тусам. Сэвам антапкеӆат тайӆам, ёрн хырат хуӆ поням эӆты. Туняӆт хуӆ шук верты утаӆтысам. Оӆаӊан ай сорт сох эӆты ёнтсам, юхат нови хуӆ эӆты. Опием няхаӆ, ястаӆ: «Катра ма туп ӆоват наӊена актыӆысам, ин па хуӆ сохӆан па мосӆат. Апӆам муйн ӆапатты питӆаӆӆам?»
Ёнтты сохӆам «Душа тундры» фестиваля ӆэсятыӆысӆам. Иса ёшан ёнтсаӆам. Ма нумастэман, хун сох ёнтӆа, антом туп ернас мосаӆ. Сэвам вай, нир па ат тайӆ. Хоӆна антапкеӆан, росэӊ охшаман, щашкан сахан ӆэсятӆэм. Хоӆ иса яха ат ӆойӆат. Ханты хоят, ванты, хорамаӊа еӆта ат вантасас.
Аӊкем уӆмаӆан, иса моӆты верас. Кашӊ эвеӆ сахан, вайн ӆэсятсаӆӆы. Ма эвиӆам па вайн ёнтсаӆӆы. Ай порайн уӆмеман, ӆув ханшам ханшиӆаӆ нэпека понӆаӆӆам, нэпек хуват сюрытӆаӆӆам. Пенсияя манмем юпийн, ямашак ёнтасты питсам. Ма муй тахайн уӆӆыӆам, катра пормас этаӆтыты тахаята яӊхӆам. Суматвоша яӊхтэман, симась тахаята иса ӆоӊтыӆам.
Тамась вантопса харатан манэм сикем умась уӆтыя, ёнтам пормасӆам этаӆтысайт. Еӆӆы пеӆа па яӆап сохат ёнтӆам».
Щашкан эӆты манэм умасьшак ёнтты
«Щукщатты пора» вантопсайн хоӆна Наталья Яковлевна Шульгина, Асов курт нэӊие, щашкан эӆты ёнтам ернасӆаӆ па па пормасӆаӆ этаӆтысайт. Тус нэӊиев рупатайӆы ант уӆӆыйӆ, вератты пеӆа самаӆ шеӊк хошийӆ.
Ёхатты кум ант шитас, телефон хуват ясаӊ верас: «Ма ай пора эӆты вератты питсам, аӊкеман утаӆтасайм. Муӊ хоӆна си порайн ашкуӆайн ёнтассув, сэвсув. Там вантопсайн этаӆтыты сохӆам 2020-мет таӆ эӆты ёнтман усат. Хасям таӆан «Ямалица» манам касапсая ёх хоята, нэӊата па няврэмата ёнтам ернасат, охшамат, сэвам вайт, посат, сэват ӆэсятыӆысам. Там вантопсайн ӆув па альман уӆӆат. Ма ӆувиӆаӆ 2023-мет таӆан ӆэсятсаӆӆам.
Еӆӆы щашкан сахат ёнтты па вуӆы сох пиӆан рупитты утсиӆам. Си еӆпийн сак пиӆан рупитсам, си вер еӆӆы па туӆэм. Хун хоятата ернасат ёнтӆам, сак лопсат инсясӆат. Шашкеӆат сэвӆам, тонты пиӆан рупитты питсам. Аӊкем уӆмаӆ порайн, тонты эӆты архорпи хинтат, хошапат верас, манэм утаӆтасӆы. Хасям таӆатан, фестивалята хуӆ поням сох эӆты хирыет ёнтыӆысам. Муй иса верты ӆытӆайм. Туп щашкан эӆты манэм умасьшак ёнтты.
Округ, район хуват манты «Мой Шурышкарский», «Душа тундры», «Ямалица» фестивалятан кашӊ порайн пиӆтасьӆам. Ёнтты сохӆам, сэвты па верты пормасӆам сита этаӆтыӆайт. Симась тахайн верты утаӆтапсаята кашӊ порайн яӊхӆам, яӆап ота утаӆтыӆам. Кашӊ симась пиӆтасьты тахаятан мойӆапса нэпекан юкантман уӆӆам. Хасям таӆан Ёмвош округ Тегинской каш верты хотан «Хуӆ сох верат» вантопсайн дипломан мийӆысайм, Суматвош районан «Визит дружбы» уйтантопсайн благодарственной письмайн постасайм. Хоӆна там таӆан «Знакомьтесь, мастера России» щашкан па хуӆ сох пиӆан рупата хуват утаӆтапса етшаптасам».
«Щукщатты пора» вантопса курк тыӆась хольмаӊ пеӆа нийӆмет хатӆ унты манты питаӆ. Вошан уӆты кашӊ хоят тохи яӊхты верытаӆ, няврэмӆаӆ-хиӆыӆаӆ тутӆыты.
Еӆӆы пеӆа, тус ханты нэӊийиӆув, хорам ханты ёх тайты сохат еӆӆы ёнтаты, вантопсаятан этаӆтыяты, хошты верӆана няврэмӆув утаӆтыяты. Тумтак ёш па тумтак кур.
Альбина Тырлина ханшам потар
Авторы
Лух Авт
Темы