Лух Авт
Рут ясаң пиӆн рупитаӆ
Там йисан ямкем ар хоят ӆый рут ясңеӆ пиӆн уӆапса хуватан рупитӆат. Ӆый кутэӆан Любовь Геннадьевна Возелова, ищиты ям ар таӆ сыс ханты мирэв йис потрат, монщат, арат, уӆты-хоӆты щират кашң пуш вантаӆ па артаӆаӆ.
Ёхи хащам таӆатан там нэңев Ямал мувеван Пулңават вошан «Центр изучения Арктики» нэмпи тахайн сыр-сыр наука верат ӆэщатман рупитаӆ. Муши воша Ӆорвош района айкеӆат акаттыя яңхмеман, ма ӆув пиӆэӆан щита уйтантысам па уӆапсайӆ, муй рупатайӆ эӆты иньщассэм.
– Любовь Геннадьевна, муйсыр хоттэӆ ёхат кутан наң сэма питсан, маты таха хоща энамсан па хота ашкуӆайн утаӆтысан?
– Ма вуӆы тащатан яңхты хоятат хоттэӆ ёх хоща сэма питсам па айтэӆн щита усам, муй энамсам. Ӆапатмет таӆа ювмеман, аңкеман-ащеман утаӆтытыя тусаям.
Питӆор куртан кутап ашкуӆа-интернат хоща иса усам. Аңкем — Парасковья Ивановна па ащем — Геннадий Алексеевич Возеловңан уӆапсаеӆ хуваттыйн Кев пелакан «Горковской» нэмпи совхоз вуӆы тащатан рупитсаңан. Щаӆта ма Питӆор куртан яртъяңмет классэм етшаптамеман мет оӆңа нумассам Пулңават вош педучилища хоща еӆӆы утаӆтытыя. Щи ураңан арсыр мосты нэпекат ияха ӆэщатсам па тохи китсам. Ванта, ашкуӆаев етшаптам похат муй эвет ар пелак хоӆыена щи воша мантсат. Хун ма Пулңавта актащты питщасам, аңкеман иньщмасаям: «Эвие, наң хоӆна шеңк аие, муй щирн па щи ӆоват ун воша манӆан? Мосаң, там ашкуӆаеван 10-11-мет классңан етшаптаӆан па щи юпийн веӆщи па тахая утаӆтытыя актащӆан». Ма матты ки ӆув ясаңӆаӆ хувн ӆаваӆсам, мохты кашащсам Питӆор куртан кутап ашкуӆайн еӆӆы утаӆтытыя.
– Маты таӆн наң кутап ашкуӆа етшаптасан, муй хорасап вер щирн еӆӆы пеӆа уталтыты номсат версан па муйсыр ун вошн утаӆтытыя питсан?
– Щиңанща 1996-мет таӆн хащам 10-11-мет классңан етшаптасам па мохты А.И. Герцен нэмпи Российской государственной педагогической университета Петра Хон воша мантсам. Щита ма «учитель начальных классов» щирн утаӆтыты питсам. Вет таӆ, ма щирэман, сора манас. Диплом нэпек ёша пайтсам па ёхи ёхатсам. Юхат «Управление образования» тахая Муши воша яңхсам па манэма рупата каншсам. Щи таха кущайт потартсат, хоты там таӆн вошаң ашкуӆайн айшак классатан няврэмат утаӆтаты хоят тармаӆ. Щаӆта яма артаӆасат Ӆорвош район ӆоватан уӆты ашкуӆа хотат па щимащ айкеӆ версат, туп Ямкуртан оӆаңмет па няӆмет классат вуш унты няврэмат утаӆтаты нэ мосаӆ. Ма еша нумассам па Ямкурт ашкуӆайн рупиттыя ант кашащсам.
– Любовь Геннадьевна, маты тахайн юхат наңена мосты рупатаен мощатсан?
– Щит атэӆ потар. Юхат, ванта, Аксарка вошан Приуральской районан кутап ашкуӆа-интернат хотан рупатая вусаям. Щи тахайн няврэмат хатӆ сыс вантты па ӆаваӆты нэ щирн 2001-мет таӆ эӆты па 2003-мет таӆ вуш унты рупитсам. Ищи порайн щи интернат хотэва округ «Институт усовершенствования учителей» эӆты кущайт ёхтыӆысат па артаӆасат, муй щирн муң няврэмат пиӆн арсыр ёхи маты урокат ханты ясаңан ӆэщатӆув. Щи хатӆатан ма кущаята альсам, муй щирн ай похат па эвет пиӆн рупиттыя верытӆув. Щи вер юпийн Пулңават вош «Институт усовершенствования учителей» хота ханты ясаң методист нэ щира вохсайм.
Щитэм онтасн вантсам, муй щирн ханты ясңа, литературая няврэмат округев ӆоватан уӆты ашкуӆаятан утаӆтаӆайт. Ям хув ма щи тахаеман рупитсам. Щи порайн муң арсыр яӆап киникайт ӆэщатсув па туса ханшсув, ӆуӆан ай ёхӆув щитат хуватан еӆӆы утаӆтытыя верытсат. Манэма, шеңк ям, ошаң-щащаң хоятат нётсат: Валентина Нёликовна Няруй, Галина Ивановна Вануйто па Галина Гавриловна Попова.
– Маты таӆ вуш эӆты наң наука щирн ханты ясаң пиӆн рупитты питсан?
– 2014-мет таӆ вуш эӆты Ямал муван Пулңават вошан «Центр изучения Арктики» нэмпи тахайн научной верат ӆэщатман уӆӆам. Щи верат ураңан А.И. Герцен нэмпи Российской государственной педагогической университетан «Кафедра уральских языков» хоща 2018-мет таӆн аспирантура етшаптасам.
Тамхатӆ па наука щирн ханшты «Фразеология хантыйского языка» нэпекем сохнаптаӆэм. Хащам кутан ястатыя вутщиӆам, хоты рут ясаң пиӆн уӆапсаем хорасн аӆ умащ еӆӆы рупиттыя!
Владимир Енов ханшам потар
Авторы
Лух Авт
Темы