Лух Авт
Рут ясңаӆ самаӆан тайсаӆӆы
2024-мет таӆан яӆап таӆ тыӆащ хольмаң пеӆа ветмет хатаӆан Пётр Ефимович Хатанзеев сот хольмаң таӆа йис ӆуӆан. Ӆув 1894-мет таӆан сэма питас па 1970-мет таӆ унты ус. Там хоятэв мет оӆңа Пулъёхан хантэт ясаң нэпека ханшты щира ӆэщатас.
Ай пора уӆапса
Пётр Ефимович вуӆы шавиты па хуӆ веӆпасӆаты хоттэӆан сэма питас. Уӆмеӆ хуват шеңк нушая усат. Хут таӆа ювмаӆ порайн, Обдорск вошан миссионерской приюта маса. Щита ӆув хорпеӆ шукащты няврэмат пиӆан игумен Иринарх Шемановский ёша питмаӆан, ханшты па ӆуңатты утаӆтаса. Иван Семёнович Шемановский ханты па ур хоятат грамотая утаӆтатыя шеңк ун рупата верас. Обдорской инородческой пансионан няврэмат мет оӆңа рут ясаңан, кимет таӆ рущ па рут ясаңан, хуӆмет таӆ па иса рущ ясаңан утаӆтасайт.
Юхат, вет хоят Тобольской губерния Успенской волость Зырянка курта еӆӆы утаӆтыты китсайт. 1907-мет таӆан утаӆтыты вер сохаптаты ох ант тайман, няврэмат ашкуӆа эӆты пуңӆа воштаӆайт. Щиты Пётр Хатанзеев яңкем таӆ митхуя рупитас. Хота муй рупата уӆ тохи манаӆ, ӆуңан хуӆ веӆпасӆаман ус, таӆан пормасат ӆуңтас па йиңк тувман рупитас.
Утаӆтаты хоята рупитты таӆат
Имоӆтыйн утаӆтаты ху Георгий Иванович Артеев пиӆан уйтантыйӆ, маты хоятаӆ, уӆмаӆ хуват, иса ям номасан нумман тайсаӆӆы. Няврэмат утаӆтаты хоята утаӆтыты китса, утхот нэпекӆаӆ ӆэщатты нётса па щи пора эӆты Пётр Ефимович Хатанзеев хоятат утаӆтаты хоята рупитты питас.
1926-мет таӆан Топоӆ вош овс муватан хоятат ханшман яңхас. Кат таӆ кем ханты па ур ясаң мийман Топоӆ вош педагогической училищайн рупитас, щаӆта па Ямал мув народной образование хота инспектора па методиста рупитты манас. 1939-мет таӆан Хон Петра вошан Овс мув няврэмат утаӆтыты институт етшаптас. Воӆаң Ляль етшаты еӆпийн Ёмвош педагогической училищайн рупитас, юхат па Пулңават педагогической училищая рупитты китса.
Ясаң пиӆан рупатайӆ шеңк самаңа тайсаӆӆы
Рупитмаӆ порайн, ур ху ӆухсаӆ Иван Ного пиӆан шеңк ванан ус. Монщат, потрат акатман Ямал мув хуват пиӆаңа яңхсаңан. Олаң литературной объединение хоща яха ӆоңман усңан. Ур, саран па ханты ясңатан яма потарман «Красный Север» редакцияйн па ур ясаң «Няръяна Нгэрм» газетаятан рупитас. РСФСР Академия педагогической наук НИИ национальной ашкуӆа внештатной сотрудника па ӆуңтасас.
1930-мет таӆан оӆаң ясаң утаӆтыты книгайӆ хот питара ханаӆты обои нэпекан ханшиӆысӆы. Ханшам букваряӆ хоятатан ин там хатӆ унты хоӆна мосман тайӆа. Юхат щи нэпекаӆ Ӆорвош хантэт ясңа па понтсаӆӆы. А.С. Пушкин «Дубровский», «Хуӆ веӆты ики па сорнең хуӆ эӆты монщ», Максим Горький ханшам потар шупат, Советской Союз Воӆаң ар, Д.А. Фурманов «Василий Иванович Чапаев» ӆуңатты нэпек, Тарас Шевченко ӆуңтарат рущ ясаң эӆты ханты па ур ясңата толмащсаӆӆы. Щиты толмащтаӆ эӆты, ӆув номсаӆа ёхатты монщат, ӆуңтарат, потар шупат ханшты питас. «Ой» («Счастье») ханшам йис потраӆ нарасӆыты сыйн понтсаӆӆы.
Ханты па ур ясаңан ханшам потрат
Пётр Ефимович уӆмаӆ хуват иса рут ясңат пиӆан рупитас. Ар ошаң потрат ханты па ур ясаңан ханшас. Ай няврэмат кеша ханты ясаңан ханшам «Букварь» этмаӆ юпийн, 1955-мет таӆан яӆпа ӆэщатса. Кат таӆ хащам юпийн па яӆаптаты вутщисӆы, туп мосты рупата верты хоятатан ястам ясңаӆ ант хуӆса. «Русско-хантыйский словарь» книга шеңк ӆэщатты ӆаңхаса, уӆмаӆан ар ясаң ош пайтты щира карточкайт ханшас. Щи ун рупатайӆ мир хоят сэма па ант этас.
Иса нумман тайӆа
Кина верты па ӆуңатты нэпек ханшты хоятат, утаӆтыты няврэмат, М.В. Ломоносов нэмпи МГУ географической факультет учёной икет-нэңат, потарӆаӆ толмащты нётапса вохсат. Пётр Хатанзеев кашң хоят пеӆа самаң ус, иса нётас. Хон мув хуват ант уятты хоятат ханты па ур хоятат уӆапса эӆты ӆуңатты нэпекат вохман потар айкеӆ Пётр Ефимовича китыӆысат. Нётапса ханшты нэпекӆаӆ акатман па шавиман тайсаӆӆы. Кашң письмайӆ хоща ёхӆы китам потраӆ па хатӆ пос ханшман тайс.
Ямал мувеван П.Е. Хатанзеев иса нумман тайӆа. Ашкуӆаятан, няврэмат рупата пеӆа утаӆтыты хотатан утаӆтаты хоятат энамты няврэмата иса потарӆат, муй хорпи ясаң туты ям хоят муң тайсув, окружной телевидение хоща нёхты хорат вантты, газета лопсатан, нэпек шавиты хотатан ӆув уӆапсайӆ эӆты ӆуңатты рахаӆ. И.С. Шемановской нэмпи катра пормас шавиты хотан ин там хатӆ унты ӆув ёшаӆан ханшам нэпекат, книгайт, хорат шавиман тайӆайт.
Зоя Куртямова ханшам потар
Авторы
Лух Авт
Темы